لاہور: حکومت پنجاب نے صوبائی دارالحکومت لاہور میں ٹرام سروس کے آغاز کی حتمی تاریخ بتادی۔

صوبائی وزیر ٹرانسپورٹ بلال اکبر کے مطابق ٹھوکر سے ہربنس پورہ تک ٹرام لائن کا ابتدائی ٹرائل کامیابی سے مکمل ہوچکا ہے جس کے بعد فروری 2026 میں باضابطہ سروس شروع کردی جائے گی۔

وزیر ٹرانسپورٹ نے بتایا کہ ایک ٹرام میں بیک وقت 270 مسافروں کی گنجائش ہوگی جب کہ اس منصوبے پر 3 ملین ڈالر لاگت آئے گی۔ اس حوالے سے پنجاب نیسپاک اور ماس ٹرانزٹ اتھارٹی کے افسران نے حال ہی میں چین کا دورہ بھی کیا ہے۔

بلال اکبر نے مزید بتایا کہ فیصل آباد اور گوجرانوالہ کے لیے بھی میٹرو ٹرین سروسز کی منصوبہ بندی کی جا رہی ہے۔

ان کا کہنا تھا کہ فیصل آباد میٹرو روزانہ 3 لاکھ مسافروں کو سہولت فراہم کرے گی جب کہ گوجرانوالہ میٹرو سے روزانہ 1 لاکھ 40 ہزار افراد مستفید ہوں گے۔ فیصل آباد میٹرو پر 110 ملین ڈالر اور گوجرانوالہ میٹرو پر 50 ملین ڈالر خرچ ہوں گے۔

انہوں نے مزید کہا کہ لاہور میں موٹر سائیکلوں اور دیگر گاڑیوں سے بڑھتی ہوئی آلودگی ایک بڑا چیلنج ہے، یہ ٹرام اور میٹرو منصوبے ماحولیاتی مسائل کو کم کرنے کی حکومتی حکمتِ عملی کا حصہ ہیں۔