اسلام آباد: وزیراعظم شہباز شریف سے چین کے وزیر خارجہ وانگ ژی نے ملاقات کی، جس میں نائب وزیراعظم اسحاق ڈار، کابینہ کے ارکان اور چیف آف آرمی اسٹاف فیلڈ مارشل عاصم منیر بھی شریک تھے۔

ملاقات کے دوران دونوں ممالک کے درمیان دوطرفہ تعلقات، اہم قومی و علاقائی امور اور باہمی تعاون پر تفصیلی گفتگو ہوئی۔

 اعلامیے کے مطابق فریقین نے پاکستان اور چین کے درمیان تعلقات کو مزید وسعت دینے اور ہر سطح پر شراکت داری کو مستحکم بنانے پر اتفاق کیا۔

وزیراعظم شہباز شریف نے چین کی جانب سے پاکستان کی خودمختاری، سالمیت اور ترقی میں مسلسل حمایت پر شکریہ ادا کیا اور کہا کہ پاکستان، چین کے بنیادی قومی مفادات کی مکمل حمایت جاری رکھے گا۔

دوران ملاقات انہوں نے سی پیک کو پاکستان کی سماجی و اقتصادی ترقی کا ضامن قرار دیتے ہوئے دوسرے مرحلے میں ہونے والی پیش رفت پر بھی اطمینان کا اظہار کیا۔

وزیراعظم نے تجارت، سرمایہ کاری، انفارمیشن ٹیکنالوجی، زراعت، صنعت اور معدنیات سمیت دیگر شعبوں میں تعاون بڑھانے کی ضرورت پر بھی زور دیا۔

اس دوران چینی وزیر خارجہ وانگ ژی نے کہا کہ چین، پاکستان کے ساتھ اپنے تعلقات کو نئی بلندیوں تک لے جانا چاہتا ہے اور علاقائی امن، ترقی اور استحکام کے لیے مل کر کام کرتا رہے گا۔

وزیراعظم نے صدر شی جن پنگ کی قیادت کو سراہتے ہوئے پاک چین دوستی کو مزید مضبوط بنانے کے عزم کا اعادہ کیا اور بیجنگ میں صدر شی جن پنگ سے اپنی ملاقات کو خوشگوار اور نتیجہ خیز قرار دیا۔

وزیراعظم نے اپنے آئندہ دورہ تیانجن و بیجنگ اور شنگھائی تعاون تنظیم (ایس سی او) کے اجلاس میں شرکت کے ارادے کا اظہار کیا۔

 علاوہ ازیں وزیراعظم چین میں دوسری عالمی جنگ کی 80ویں سالگرہ کی تقریبات میں بھی شرکت کریں گے، جہاں ان کی صدر شی جن پنگ، وزیراعظم لی کیانگ اور دیگر چینی قیادت سے ملاقاتیں متوقع ہیں۔