بانی پی ٹی آئی جیل سے باہر آسکتے تھے مگر بات چیت آگے نہ بڑھ سکی ۔ اعجاز الحق نے کہا کہ میں سمجھتاہوں کہ وہ جیل سے باہر آکر کہیں اور بھی جاسکتے تھے۔

یہ انکشاف مسلم لیگ ضیاکے سربراہ اعجاز الحق نے بول نیوز کے پروگرام بول رپورٹس ود بتول راجپوت میں کیا۔

انہوں نے کہاکہ بانی تحریک انصاف سے مذاکرات کا سلسلہ شروع ہوا تھا اوریہ بات چیت کچھ حد تک آگے بھی بڑھی تھی۔

ان کا کہناتھاکہ بہت سی چیزیں بانی تحریک انصاف کی آگے بڑھ سکتی تھیں ،میں صرف رہائی کی بات نہیں کررہا۔

اعجاز الحق نے کہاکہ بانی پی ٹی آئی نے مذاکرات کے دوران ایک شرط رکھی تھی کہ ڈاکٹر یاسمین راشد کو10 گھنٹے کے اندر اسپتال منتقل کیا جائے، تاہم بات چیت مزید آگے نہ بڑھ سکی۔

انہوں نے مزید کہا کہ بانی تحریک انصاف نومبر 2024 کے اسلام آباد مارچ کو کال آف کرنا چاہتے تھے، لیکن پارٹی کے اندرونی حلقوں نے اس فیصلے سے اتفاق نہیں کیا۔

ان کا کہناتھاکہ تحریک انصاف کے رہنماؤں کا مؤقف تھا کہ ہم 5لاکھ افراد کے ساتھ اسلام آباد آئیں گے اور اس بڑے اجتماع سے انقلاب برپا ہو جائے گا۔

سربراہ مسلم لیگ ضیا نے یہ بھی کہا کہ اڈیالہ جیل میں جب کچھ لوگ بانی تحریک انصاف سے مذاکرات کے لیے پہنچے تو وہ 9 مئی واقعات کے حوالے سے اظہارِ افسوس کےلیے رضامند ہو گئے۔