صوبائی وزیرِ توانائی ناصر حسین شاہ نے کہا کہ  کراچی کی صنعت اور رہائشیوں کو سیپرا کے تحت سستی بجلی فراہم کی جائے گی۔

ناصر حسین شاہ نے کہا کہ سستی بجلی کا نرخ کےالیکٹرک کی نسبت بہت کم ہو گا، جو بجلی ہم خود بنائیں گے اور ایس ٹی ڈی سی کے تحت خود ترسیل کریں گے۔

صوبائی وزیرِ توانائی کا کہنا تھا کہ بجلی کے نرخ اب ہم خود طے کر سکیں گے، ایس ٹی ڈی سی کی ترسیل شدہ بجلی کا نیپرا کے نرخوں سے تعلق نہیں ہو گا، بجلی کا نرخ بھی نیپرا سے بہت کم ہو گا، اس حوالے سے سیپرا میں لوگوں کو بھرتی کر لیا گیا ہے، رواں ماہ اگست ہی میں نوٹیفیکیشن جاری ہو جائے گا۔

ناصر حسین شاہ نے کہا کہ ہماری بنیادی توجہ کا مرکز اکنامک زونز ہیں، ہماری کوشش ہے کہ سیپرا کے تحت بجلی کی پہلی ترسیل کے فور کے گرڈ کو فراہم کی جائے۔

یہ بھی پڑھیں: ملک میں سرمایہ کاری اور مشترکہ منصوبوں کے بے پناہ مواقع ہیں، سید ناصر حسین شاہ

صوبائی وزیرِ توانائی کا کہنا تھا کہ ہم نے سندھ اسمبلی سے سیپرا کو آئینی طور پر منظور کروا لیا ہے، کراچی کے شہری بھی سستی بجلی حاصل کر سکیں گے، تاہم ترسیلی نظام ایس ٹی ڈی سی کے پاس ہونا چاہیے۔

ناصر حسین شاہ نے کہا کہ کے الیکٹرک کے بورڈ میں سندھ کی نمائندگی نہیں ہے، وفاق کے 3 ڈائریکٹر ہیں، وفاق سے کہا ہے کہ 1 نمائندہ وفاق کا ہو باقی 2 سندھ سے ہوں، سندھ حکومت کا کےالیکٹرک کو سولر پارکس کے ذریعے سستی بجلی فراہم کرنے کا معاہدہ ہوا ہے۔

صوبائی وزیرِ توانائی نے مزید کہا کہ کے الیکٹرک سے کہا ہے کہ سولر سے جب بجلی بن رہی ہے تو مہنگے ایندھن والی بجلی نہ خریدیں۔