کراچی میں 11 اور 12 ربیع الاول کو ہیوی ٹریفک چلانے پر پابندی عائد کر دی گئی ہے۔

ڈپٹی انسپکٹر جنرل (ڈی آئی جی) ٹریفک پولیس پیر محمد شاہ نے شہر قائد میں 11 اور 12 ربیع الاول کو ڈمپر اور دیگر ہیوی ٹریفک چلانے پر پابندی کا نوٹی فکیشن جاری کردیا ہے۔

ٹریفک پولیس حکام کے مطابق تمام ڈمپر مالکان کو پابندی سے متعلق آگاہ کر دیا گیا ہے جبکہ پابندی کی خلاف ورزی کے مرتکب ڈمپرز اور دیگر ہیوی ٹریفک کی گاڑیوں کے خلاف کارروائی کی جائے گی۔

یہ بھی پڑھیں: قومی اسمبلی کا اجلاس یکم ستمبر کو طلب، ربیع الاول مذہبی جوش و جذبے سے منانے کی ہدایت

پیرمحمد شاہ نے کہا کہ عید میلادالنبی ﷺ پر ہزاروں لوگ مذہبی اجتماعات میں شرکت کرتے ہیں، بڑی ریلیاں پیدل اور گاڑیوں کی صورت میں اہم شاہراہوں پر نکلتی ہیں، عوام  کے تحفظ کے لیے ہر قسم کے ہیوی ٹریفک کو معطل کرنا ناگزیر ہے، اسی لیے جمعہ 11 اور ہفتہ 12 ربیع الاول کو ہرقسم کے ہیوی ٹریفک پر پابندی ہوگی، تاکہ ہیوی ٹریفک کے نتیجے میں حادثات اور ناخوشگوار واقعات سے بچا جاسکے۔