لاہور: وزیراعلیٰ پنجاب مریم نواز شریف نے کہا ہے کہ سیلابی ریلے کے باوجود کوئی بڑا جانی نقصان نہیں ہوا، اللہ کا شکر ہے۔

وزیراعلیٰ مریم نواز نے دریائے راوی کے متاثرہ علاقوں کا دورہ کیا اور مختلف مقامات پر انتظامات کا جائزہ لیا ۔

اس موقع پر وزیراعلیٰ مریم نواز نے میڈیا سے گفتگو کرتے ہوئے کہا کہ پنجاب کے تین دریاؤں میں اس وقت طغیانی ہے اور سیلابی ریلے گزر رہے ہیں، تاہم بروقت اقدامات کے باعث بڑے جانی نقصان سے بچا لیا گیا ہے، اگر فوری اقدامات نہ کیے جاتے تو صورتحال مزید سنگین ہو سکتی تھی۔

انہوں نے واضح کیا کہ گجرات، نارووال، اور سیالکوٹ میں سیلابی کیفیت خاصی شدید رہی لیکن انتظامیہ کی محنت اور ردعمل کی رفتار کے باعث کسی قسم کی اموات رپورٹ نہیں ہوئیں۔

مریم نواز نے بتایا کہ آج صبح میں نے وزیراعظم شہباز شریف کے ہمراہ نارووال کا فضائی دورہ کیا، وہاں کے کئی علاقے مکمل طور پر زیر آب آ چکے ہیں۔

وزیراعلیٰ نے مزید کہا کہ اس سال شدید بارشوں کے باوجود صوبے میں پانی جمع ہونے کی شکایات کم رہیں، جو ہماری نکاسی آب کے نظام کی بہتری کو ظاہر کرتا ہے۔

مریم نواز نے ریسکیو، انتظامیہ اور دیگر اداروں کی کارکردگی کو سراہتے ہوئے کہا کہ حکومت ہر ممکن حد تک متاثرہ افراد کی مدد کر رہی ہے اور ریلیف و بحالی کا عمل جاری رہے گا۔