نیویارک: وزیراعظم شہباز شریف نے نیویارک میں آسٹریا اور کویت کے رہنماؤں سے اہم ملاقاتیں کیں جس دوران انہوں نے جرمن اور عربی زبان میں گفتگو کی۔

اقوام متحدہ کی جنرل اسمبلی کے موقع پر وزیراعظم شہباز شریف نے نیویارک میں مختلف عالمی رہنماؤں سے ملاقاتیں کیں جن میں آسٹریا کے فیڈرل چانسلر کرسچن اسٹاکر اور کویت کے ولی عہد عزت مآب شیخ صباح الخالد الحمد المبارک شامل تھے۔

وزیراعظم شہباز شریف نے آسٹریا کے فیڈرل چانسلر کرسچن اسٹاکر سے ملاقات کے دوران خوشگوار گفتگو کی۔

اس موقع پر دونوں رہنماؤں نے جرمن زبان میں تبادلۂ خیال بھی کیا۔ وزیراعظم نے جرمن زبان میں چانسلر کو اپنے 1980 کی دہائی میں کیے گئے دورۂ آسٹریا کی یادیں تازہ کرکے واقعات سنائے۔

Advertisement

وزیراعظم کی نیو یارک میں آسٹریا کے فیڈرل چانسلر کرسچن اسٹاکر اور کویت کے ولی عہد عزت مآب شیخ صباح الخالد الحمد المبارک الصباح سے ملاقات میں جرمن اور عربی زبان میں خوشگوار گفتگو
وزیرِ اعظم نے آسٹریا کے چانسلر کو 80 کی دہائی میں اپنے آسٹریا کے دورے کے بارے میں بتایا. کویتی ولی عہد… pic.twitter.com/MuFPjY49co

— Government of Pakistan (@GovtofPakistan) September 24, 2025

علاوہ ازیں وزیراعظم نے نیویارک میں کویت کے ولی عہد شیخ صباح الخالد الحمد المبارک سے بھی ملاقات کی۔ اس دوران دونوں رہنماؤں نے عربی زبان میں دوستانہ گفتگو کی۔

وزیراعظم شہباز شریف نے عربی زبان میں پاکستان اور کویت کی دیرینہ دوستی اور شراکت داری کو اجاگر کرتے ہوئے اسے ’’دائمی اور لازوال‘‘ قرار دیا۔