نیویارک: اقوام متحدہ میں پاکستان کے سیکنڈ سیکریٹری محمد راشد نے بھارت کے الزامات اور مؤقف کا دوٹوک جواب دیتے ہوئے کہا ہے کہ بھارت کی جھنجھلاہٹ اور سطحی سوچ عالمی سطح پر بے نقاب ہو چکی ہے۔

محمد راشد نے جنرل اسمبلی میں خطاب کے دوران کہا کہ یہ اقوام متحدہ ہے، کوئی مقامی سیاسی جلسہ نہیں، بھارت کے پاس دلائل نہیں بلکہ صرف طنز و تمسخر ہے۔

انہوں نے کہا کہ بھارتی ایجنسیاں ہمسایہ ممالک میں دہشت گردی کی سرپرستی کرتی ہیں، بھارت پاکستان سمیت سرحد پار دہشت گردی میں ملوث رہا ہے اور اس کی پالیسیاں علاقائی امن کو سبوتاژ کرنے پر مبنی ہیں۔

پاکستانی سفارتکار نے کہا کہ بھارت کے اقدامات اس کے انسدادِ دہشت گردی کے دعوؤں کی نفی کرتے ہیں، بھارت امن نہیں بلکہ انتشار چاہتا ہے۔

محمد راشد نے یاد دلایا کہ پاکستان نے کلبھوشن یادیو کو رنگے ہاتھوں گرفتار کیا اور اس سے بھارت کے عزائم دنیا کے سامنے آئے۔

انہوں نے کہا کہ پاکستان نے پہلگام واقعے کی مذمت کی اور شفاف تحقیقات کے لیے تعاون کی پیشکش بھی کی، تاہم بھارت نے مئی میں جارحیت کرتے ہوئے معصوم بچوں اور خواتین کو نشانہ بنایا۔

پاکستانی سیکنڈ سیکریٹری نے مزید کہا کہ پاکستان نے ذمہ دار ریاست کی حیثیت سے ہمیشہ امن کی کوشش کی ہے لیکن بھارت کی جارحیت کے جواب میں پاکستان کو اپنا دفاعی حق استعمال کرنا پڑا۔