وزیراعظم محمد شہباز شریف ولی عہد شہزادہ محمد بن سلمان کی دعوت پر وفد کے ہمراہ ایک روزہ رکاری دورے پر سعودی عرب پہنچ گئے۔

رائل ٹرمینل پر ڈپٹی گورنر ریاض شہزادہ محمد بن عبدالرحمن بن عبدالعزیز نے وزیر اعظم کا استقبال کیا۔

استقبال کرنے والوں میں دیگر سعودی اعلیٰ شخصیات بھی موجود تھیں، جبکہ پاکستانی سفیر احمد فاروق اور دیگر سفارتی افسران نے بھی وزیراعظم کا خیر مقدم کیا۔

ائیرپورٹ لاونج میں وزیراعظم شہبازشریف اور ڈپٹی گورنر شہزادہ محمد بن عبدالرحمن بن عبدالعزیز سے ملاقات ہوئی،  جس میں دونوں کے درمیان پاک سعودی تعلقات اور دو طرفہ تعاون پر تبادلہ خیال کیا گیا۔

یہ بھی پڑھیں: وزیراعظم شہباز شریف آج سے سہ ملکی دورہ پر روانہ ہونگے

وزیراعظم شہبازشریف آج سعودی ولی عہد شہزادہ محمد بن سلمان سے ملاقات کریں گے، جس میں مشرق وسطیٰ کی صورتحال سمیت دیگر اہم امور پر تبادلہ خیال کیا جائے گا۔

دونوں رہنماؤں کے درمیان دو طرفہ تعلقات کو مزید فروغ دینے کے حوالے سے بھی گفتگو کی جائے گی، اس کے علاوہ معاشی تعاون میں وسعت، سرمایہ کاری کے نئے مواقعوں کی تلاش، توانائی کے منصوبوں اور خطے میں امن و استحکام پر تفصیلی بات چیت کریں گے۔

نائب وزیرِ اعظم و وزیرِ خارجہ محمد اسحاق ڈار، وزیرِ دفاع خواجہ محمد آصف، وزیرِ خزانہ محمد اورنگزیب، وزیرِ اطلاعات و نشریات عطاء اللہ تارڑ ، وفاقی وزیر ماحولیات مصدق ملک  اور معاون خصوصی طارق فاطمی بھی وزیرِ اعظم کے ہمراہ ہیں۔

 قبل ازیں وزیراعظم شہباز شریف کا سعودی فضائی حدود میں داخل ہوتے ہی خاص استقبال کیاگیا۔
سعودی فضائی حدود میں داخل ہوتے ہی وزیراعظم شہباز شریف کے طیارے پاک ٹو کو شاہی فضائیہ کے طیاروں نے حفاظت میں لے لیا، سعودی شاہی فضائیہ کے طیاروں نے وزیراعظم کے طیارے کو ایسکورٹ کیا۔

وزیر دفاع خوجہ اصف کے مطابق سعودی عرب حکومت کی طرف سے برادرانہ محبت اور احترام کا مظاہرہ کرتے ہوئے سعودی ائر فورس نے وزیر اعظم شہباز شریف کے طیارے کے سعودی ائر سپیس میں داخل ہوتے ہی اپنی جلو اور حفاظت میں لے لیا۔

عالم اسلام میں یہ مقام اللہ کی مہربانی، شہباز شریف کی سفارتی مہارت اور ہماری افواج کی بے مثال کامیابیوں کا ثمر ہے۔