اسلام آباد: کمانڈر بحرین نیشنل گارڈ جنرل شیخ محمد بن عیسیٰ بن سلمان آل خلیفہ نے ایئر ہیڈکوارٹرز کا دورہ کیا ہے، جہاں ان کی ملاقات سربراہ پاک فضائیہ ایئر چیف مارشل ظہیر احمد بابر سدھو سے ہوئی۔

پاک فوج کے شعبہ تعلقات عامہ (آئی ایس پی آر) کے مطابق کمانڈر بحرین نیشنل گارڈ نے ایئر ہیڈکوارٹرز کا دورہ کیا جس دوران سربراہ پاک فضائیہ ایئر چیف مارشل ظہیر احمد بابر سدھو سے ملاقات میں دونوں رہنماؤں نے پائیدار دفاعی تعاون کے عزم کا اعادہ کیا اور مشترکہ تربیتی اقدامات سمیت ہوا بازی کی صنعت میں ہر ممکن تعاون پر تبادلہ خیال کیا۔

آئی ایس پی آر کا کہنا ہے کہ ایئر چیف مارشل ظہیر احمد بابر سدھو نے بحرینی کمانڈر کو پاک فضائیہ کے جاری منصوبوں سے آگاہ کیا جن میں انفراسٹرکچر کی ترقی اور تربیتی شعبے کی تشکیل نو شامل ہے۔

ترجمان پاک فوج نے بتایا کہ ایئر چیف نے کہا کہ ان تزویراتی اقدامات سے فضائیہ کی آپریشنل صلاحیتیں مزید مستحکم ہوں گی اور ملٹی ڈومین وارفیئر میں تکنیکی برتری حاصل ہوگی۔

پاک فوج کے شعبہ تعلقات عامہ نے کہا کہ اس موقع پر ایئر چیف کا کہنا تھا کہ پاکستان اور بحرین کے درمیان دیرینہ مذہبی اور تاریخی روابط قائم ہیں جب کہ انہوں نے دفاعی تعاون خصوصاً تربیت اور مشترکہ فضائی مشقوں میں تعاون کو مزید وسعت دینے کے عزم کا اعادہ کیا۔

ترجمان پاک فوج نے مزید بتایا کہ کمانڈر بحرین نیشنل گارڈ جنرل شیخ محمد بن عیسیٰ بن سلمان آل خلیفہ نے بھارت کے خلاف پاک فضائیہ کی شاندار کارکردگی پر ایئر چیف کو مبارکباد دی اور پاک فضائیہ کی پیشہ ورانہ مہارت، آپریشنل تیاریوں اور غیر معمولی حوصلہ مندی کو سراہا۔ انہوں نے تربیتی شعبے میں تعاون کے فروغ کی دیرینہ خواہش کا بھی اظہار کیا۔