اسلام آباد: پاک بحریہ نے یوم دفاع پاکستان کو عقیدت اور قومی جوش و جذبے کے ساتھ منایا۔ اس موقع پر مختلف شہروں اور یونٹس میں خصوصی تقریبات کا انعقاد کیا گیا۔

سربراہ پاک بحریہ ایڈمرل نوید اشرف نے نیول ہیڈ کوارٹرز اسلام آباد میں یادگارِ شہداء پر پھولوں کی چادر چڑھائی اور فاتحہ خوانی کی۔

انہوں نے شہداء اور غازیوں کی عظیم قربانیوں کو خراج عقیدت پیش کرتے ہوئے کہا کہ پاکستان کا دفاع ناقابلِ تسخیر ہے اور دشمن کی کسی بھی جارحیت کا فیصلہ کن جواب دیا جائے گا۔

معرکۂ حق کی یاد تازہ

نیول چیف نے اس موقع پر کہا کہ معرکۂ حق میں پاک بحریہ کی ثابت قدمی اور مسلسل نگرانی نے بھارتی بحری بیڑے کو اپنی ہی حدود میں محدود رکھا۔ پاک بحریہ آج بھی اپنی بحری سرحدوں کے دفاع کے لیے مکمل طور پر مستعد ہے۔

ملک بھر میں تقریبات

یوم دفاع کی تقریبات کا آغاز پاک بحریہ کی تمام مساجد میں ملکی سلامتی اور خوشحالی کے لیے خصوصی دعاؤں سے ہوا۔ مختلف فیلڈ کمانڈز اور ہیڈ کوارٹرز میں بھی یادگارِ شہداء پر پھول چڑھائے گئے اور فاتحہ خوانی کی گئی۔

روایتی تزئین و آرائش

اس موقع پر پاک بحریہ کے جہازوں اور یونٹس کو بحری روایات کے مطابق خصوصی طور پر سجایا گیا جب کہ پرچم کشائی کی تقریبات نے دن کی اہمیت کو مزید اجاگر کیا۔