وفاقی حکومت نے سیلاب متاثرین کے لیے بجلی بلوں میں بڑا ریلیف دینے، فصلوں اور جانوروں کے نقصان کے معاوضہ کے لیے کسان پیکج لانے کا فیصلہ کر لیا ہے۔

غذائی تحفظ کے وزیر رانا تنویر نے کہا کہ سیلاب متاثرین کے بلوں پر ٹیکس فوری طور پر معاف کیے جائیں گے، اور اس حوالے سے کام کیا جا رہا ہے، بلوں میں ریلیف وفاقی حکومت دے گی، جبکہ لینڈ ریونیو صوبائی حکومت معاف کرے گی، سیلاب زدہ علاقوں میں بجلی کے اضافی بلوں کا نوٹس لیں گے، سیلاب متاثرہ علاقوں میں یہ وہ بل ہیں جو پہلے ہی پرنٹ ہو چکے ہیں۔

یہ بھی پڑھیں: وفاقی حکومت کا تین مراحل میں 24 سرکاری اداروں کی نجکاری کا فیصلہ

رانا تنویر کا کہنا تھا کہ بجلی کے بلوں پر جنرل سیلز ٹیکس، ایف سی سرچارج، فکس چارجز ختم کرنے پر غور کیا جارہا ہے، جبکہ فیول پرائس ایڈجسٹمنٹ پر جنرل سیلز ٹیکس اور ایکسائز ڈیوٹی کے خاتمے کے ساتھ بجلی کے بلوں پر انکم ٹیکس، مزید اور فاضل ٹیکس، ریٹیلر سیلز ٹیکس کا خاتمہ بھی زیر غور ہے۔

وزیر غذائی تحفظ نے کہا کہ سیلاب متاثرین کے لیے ریلیف پر جو ہو سکا کیا جائے گا، اس کے علاوہ سیلاب متاثرہ علاقوں کا سروے مکمل ہوتے ہی کسان پیکج کا اعلان کریں گے، ہفتے 10 دنوں تک سیلاب متاثرہ علاقوں کا سروے مکمل کر لیا جائے گا،  جبکہ سیلاب سے متاثرہ علاقوں میں فصلوں کے نقصان کا ابتدائی ڈیٹا بھی مرتب کر لیا گیا  ہے۔

رانا تنویر نے مزید کہا کہ سیلاب میں ہر فصل کا ایک سے تین فیصد تک نقصان ہوچکا ہے، سب سے زیادہ گجرانوالہ ڈویژن میں فصلوں کا 18 فیصد تک نقصان ہوگیا، سیلاب کے دوران فصلوں میں سے چاول کا سب سے زیادہ نقصان ہوا ہے۔