وزیراعظم محمد شہباز شریف نے کہا کہ اسٹاف لیول معاہدہ طے پانا، عالمی مالیاتی فنڈ کی جانب سے پاکستان کی تیزی سے بہتر ہوتی معاشی صورتحال پر اعتماد کا اظہار ہے۔

وزیراعظم محمد شہباز شریف نے پاکستان اور عالمی مالیاتی فنڈ کے درمیان ایکسٹینڈڈ فنڈ فیسیلیٹی  (ای ایف ایف ) اور ریزلیئنس اینڈ سسٹین ایبلیٹی (آر ایس ایف) کے حوالے سے 1.2 ارب امریکی ڈالرز فنڈ کے لیے اسٹاف لیول معاہدہ طے پا جانے پر  اطمینان کا اظہار کیا ہے۔

وزیراعظم نے کہا کہ یہ اسٹاف لیول معاہدہ پاکستان کے میکرو اکنامک اشاریوں میں ہونے والی  بہتری کا عکاس ہے، آئی ایم ایف کا پاکستانی معیشت کے بڑھنے کی رفتار اور اداری جاتی اصلاحات  پر اطمینان، حکومتی پالیسیوں پر ادارے کے اعتماد کا مظہر ہے۔

یہ بھی پڑھیں: آئی ایم ایف اور پاکستان کے درمیان قرض معاہدہ طے پا گیا

ان کا یہ بھی کہنا تھا کہ وفاقی وزیر خزانہ، وزیر مملکت خزانہ، وفاقی سیکرٹری خزانہ اور ان کی تمام ٹیم تحسین کی مستحق ہے، جن کی محنت کی بدولت آئی ایم ایف کے ساتھ یہ معاہدہ طے پایا۔

وزیراعظم نے مزید کہا کہ معیشت درست سمت میں گامزن ہے، پاکستان کی ترقی و خوشحالی کے لیے تمام تر اقدامات اٹھائیں گے۔