اسلام آباد: صدرِ مملکت آصف علی زرداری اور وزیراعظم محمد شہباز شریف کی جانب سے اساتذہ کے عالمی دن پر پیغام جاری کیا گیا ہے۔

صدرِ پاکستان آصف علی زرداری نے اساتذہ کو عالمی یومِ اساتذہ پر مبارکباد دیتے ہوئے کہا کہ تدریس محض پیشہ نہیں، ایک مقدس ذمہ داری ہے، اساتذہ نسلوں کے اذہان سنوارتے اور کردار کی تربیت کرتے ہیں۔

انہوں نے کہا کہ پاکستان کے دیہی و شہری علاقوں میں اساتذہ کی خدمات قابلِ تحسین ہیں، مشکل حالات کے باوجود علم کی شمع جلانے والے اساتذہ قوم کا سرمایہ ہیں، جدید دور میں اساتذہ کا کردار پہلے سے زیادہ اہم ہو گیا ہے۔

آصف زرداری نے کہا کہ طلبہ کی تیاری کے لیے اساتذہ کو ڈیجیٹل وسائل اور تربیت دینا ضروری ہے، حکومتِ پاکستان تدریس کے شعبے کی مکمل حمایت کے عزم کا اعادہ کرتی ہے، اداروں کو مضبوط بنانا، ٹیکنالوجی کا انضمام اور بہتر سہولتیں اولین ترجیحات ہیں۔

انکا مزید کہنا تھا کہ قوم کی اجتماعی ذمہ داری ہے کہ اساتذہ کی عزت و توقیر کو یقینی بنایا جائے، جو معاشرہ اپنے اساتذہ کا احترام کرتا ہے، وہ اپنا مستقبل محفوظ بناتا ہے، قومی یکجہتی، جدت اور ترقی کے لیے اساتذہ کو بااختیار بنانا ناگزیر ہے۔

’’اساتذہ کی فنی استعداد میں اضافہ حکومت پاکستان کی ذمہ داریوں میں شامل ہے‘‘

دوسری جانب وزیراعظم محمد شہباز شریف نے بھی اپنے پیغام میں کہا کہ آج اساتذہ کے عالمی دن پر پاکستان دنیا کے ساتھ ہم آواز ہو کر دنیا بھر کےاساتذہ کو خراج عقیدت اور ان کی گراں قدر خدمات پر خراج تحسین کرتا ہے۔

انکا کہنا تھا کہ عالمی سطح پر اساتذہ کے لیے دن مختص کرنا ناصرف پاکستان بلکہ دنیا بھر کے اساتذہ کی خدمات کا اعتراف کا موقع فراہم کرتا ہے، آج کے دن بالخصوص پاکستان کے طول و عرض میں بے لوث خدمات سر انجام دینے والے اساتذہ کو حکومت پاکستان اور پاکستان کی عوام کی طرف سے بھرپور خراج عقیدت پیش کرتا ہوں۔

وزیراعظم نے کہا کہ اس سال 2025 میں اساتذہ کا عالمی دن “تدریس کو ایک  باہمی تعاون اور مشترکہ پیشہ” کے طور پر اجاگر کرنے کے عنوان سے منایا جا رہا ہے۔ جس کا مقصد دنیا بھر کے تمام اساتذہ، درسگاہوں اور تعلیمی نظام میں ہم آہنگی پیدا کرنے کی اہمیت کو اجاگر کرنا ہے۔

انہوں نے کہا کہ بہترین و جدید تدریسی نظام ہی ملک و قوم کی انفرادی اور اجتماعی استعداد کار میں اضافہ کرنے کے ساتھ ساتھ حکومتی نظام، پالیسیز میں بہتری کا باعث بن سکتا ہے۔

شہباز شریف نے کہا کہ قوموں کی بحثیت مجموعی تعمیر و ترقی اور کسی بھی ملک کی نسلوں کی انفرادی تعلیم و تربیت میں اساتذہ کا کلیدی کردار ہے، ملکوں کی افرادی قوت کی علمی و فنی صلاحیتوں کا دآرومدار اس کی ذہنی نشوونما  اور عقل و شعور کے معیار پر ہوتا ہے جس کو نکھارنے میں اساتذہ کی محنت فیصلہ کن حیثیت رکھتی ہے۔

انکا کہنا تھا کہ حکومت پاکستان کی ترجیح ہے کہ پاکستان میں تعلیمی نظام کو مؤثر اور جدید دور کے تقاضوں سے ہم آہنگ بنایا جائے تاکہ ہماری نئی نسل دنیا کے علمی و فنی میدان میں مقابلہ کر کے ملک کا نام روشن کر سکے۔

انہوں نے کہا کہ نئی نسل کی تعلیم و تربیت میں اساتذہ، والدین اور معاشرے کا بحیثیت مجموعی مثبت اور تعمیری کردار ملک و قوم کی ترقی و خوشحالی اور بہترین مستقبل کا ضامن ہوتا ہے۔ جہاں اساتذہ اپنی پیشہ ورانہ ذمہ داریوں اور شاگردوں اور نئی نسل کی طرف اپنے فرائض کو بااحسن سرانجام دے رہے ہیں وہیں مجموعی طور پر معاشرے کا یہ فرض العین ہے کہ اساتذہ کی عزت و تکریم اور معاشرے میں احترام میں کسی طور بھی کوئی کمی نہ ہو۔

وزیراعظم نے کہا کہ اساتذہ کی فنی استعداد میں اضافہ اور ان کی معاشی آسودگی کا خیال رکھنا حکومت پاکستان اور صوبائی حکومتوں کی ذمہ داریوں میں شامل ہے۔ اساتذہ کو فرائض کی انجام دہی میں معاونت کے ساتھ ان کے حقوق کی حفاظت بھی اولین ترجیحات میں شامل ہے۔

شہباز شریف نے کہا کہ اساتذہ کے حقوق و فرائض کے تحفظ کے لیے نہ صرف قومی بلکہ عالمی سطح پر مجموعی کاوشوں اور تعاون کی ضرورت ہے تاکہ عالمی سطح پر اس طبقے کو موثر بناتے ہوئے دنیا کے تابندہ و روشن مستقبل کی بنیاد کو مضبوط کیا جا سکے۔

انہوں نے مزید کہا کہ بین الاقوامی سطح پر ممالک کے درمیان اساتذہ کے تبادلے اور شاگردوں کی عالمی درسگاہوں میں مشترکہ پروگرام میں شرکت ایک خوش آئند عمل ہے جس کے فروغ کے لیے کام کرنا چاہیے۔