اسلام آباد: حکومتِ پاکستان نے قومی پاسپورٹس کے ڈیزائن اور رنگ میں بڑی تبدیلی کا فیصلہ کرلیا۔

ذرائع کے مطابق ڈائریکٹوریٹ جنرل امیگریشن اینڈ پاسپورٹ نے پاسپورٹس کے رنگ اور ڈیزائن میں تبدیلی کے لیے وزارتِ داخلہ سے باضابطہ منظوری حاصل کرلی ہے۔

نئے ڈیزائن کے تحت عوامی، سرکاری اور ڈپلومیٹک پاسپورٹس کے رنگوں میں نمایاں فرق رکھا جائے گا تاکہ ہر کیٹیگری کو آسانی سے پہچانا جاسکے۔

ذرائع کا کہنا ہے کہ نئے پاسپورٹ میں ایک اہم تبدیلی یہ کی گئی ہے کہ والد کے ساتھ والدہ کا نام بھی درج کیا جائے گا تاکہ بین الاقوامی معیار کے مطابق شناختی معلومات کو مزید واضح اور جامع بنایا جاسکے۔

ذرائع نے بتایا کہ نئے پاسپورٹ کے صفحات پر چاروں صوبوں کی تاریخی و ثقافتی عمارات کی تصاویر شامل کی جا رہی ہیں جن میں لاہور کا شالیمار باغ، موئن جو دڑو، خیبر قلعہ اور مزارِ قائد جیسی عمارات کی تصویری جھلکیاں شامل ہوں گی۔

ذرائع کا مزید کہنا ہے کہ نئے پاسپورٹس کی چھپائی کا عمل شروع ہوچکا ہے۔ تاہم پہلے سے تیار 10 لاکھ پرانے پاسپورٹس کے لیمینیشن پیپرز استعمال کیے جانے کے بعد ہی نئے ڈیزائن والے پاسپورٹس کا باقاعدہ اجرا کیا جائے گا۔

ذرائع نے یہ بھی بتایا کہ نئے پاسپورٹ کا اجرا سسٹم میں جدت اور عالمی ہم آہنگی کے لیے کیا جارہا ہے تاکہ پاکستانی پاسپورٹ کو جدید سیکیورٹی فیچرز کے ساتھ بین الاقوامی معیار پر لایا جاسکے۔