اسلام آباد: وفاقی وزیر خزانہ محمد اورنگزیب نے کہا ہے کہ پاکستان  میں سعودی سرمایہ کاروں کا خیر مقدم کرتے ہیں، حکومت سعودی عرب سمیت تمام غیر ملکی سرمایہ کاروں کو مکمل تعاون اور سازگار ماحول فراہم کرنے کے لیے پرعزم ہے۔

وزیر خزانہ محمد اورنگزیب نے اپنے خطاب میں کہا کہ سرمایہ کاروں کو سازگار اور محفوظ ماحول فراہم کرنا حکومت کی اولین ترجیح ہے، کیونکہ پائیدار ترقی کے لیے نجی شعبے کا کردار انتہائی اہم ہے۔

انہوں نے بتایا کہ وہ آج آئی ایم ایف کی سالانہ میٹنگ میں شرکت کے لیے واشنگٹن روانہ ہوں گے، جہاں عالمی مالیاتی اداروں سے اہم ملاقاتیں متوقع ہیں۔

محمد اورنگزیب نے کہا کہ توانائی، ٹیکس اور گورننس سمیت معیشت کے مختلف شعبوں میں بنیادی اصلاحات کا عمل تمام متعلقہ فریقین کی مشاورت سے آگے بڑھایا جا رہا ہے۔

ان کا کہنا تھا کہ حکومتی کاوشوں کے نتیجے میں پاکستان کی معیشت نے استحکام حاصل کیا ہے اور تمام معاشی اشاریے مثبت رجحان ظاہر کر رہے ہیں۔

وزیر خزانہ نے مزید کہا کہ 3 بڑی بین الاقوامی ریٹنگ ایجنسیوں نے بھی پاکستان کے معاشی اشاریوں کو مثبت قرار دیا ہے، جو ملکی معیشت پر بڑھتے ہوئے عالمی اعتماد کا ثبوت ہے۔