پشاور: نئے وزیراعلیٰ خیبرپختونخوا کے انتخاب کیلئے اپوزیشن جماعتوں نے وزارت اعلیٰ کے لیے امیدوار کھڑا کرنے کا فیصلہ کرلیا ہے۔

ذرائع کے مطابق اپوزیشن جماعتوں کے امیدوار وزارت اعلیٰ کے لیے کاغذات نامزدگی جمع کرائیں گے، تاہم اپوزیشن جماعتوں کی جانب سے وزارت اعلیٰ کے لیے متفقہ امیدوار میدان میں اتارنے کے لیے مشاورت جاری ہے۔

ذرائع کا کہنا ہے کہ وزارت اعلیٰ کے امیدوار کے لیے ابھی تک کسی ایک امیدوار کے نام پر اتفاق نہیں ہوسکا جبکہ مسلم لیگ ن اور جے یو آئی ف نے وزارت اعلیٰ کے امیدوار کے لیے اپنے اپنے نام فائنل کرلیے ہیں۔

ذرائع نے بتایا ہے کہ جے یو آف کی جانب سے مولانا لطف الرحمان کو امیدوار بنائے جانے کا امکان ہے جبکہ مسلم لیگ ن کی جانب سے وزارت اعلیٰ کے لیے ڈاکٹر عباداللہ کا نام دیا گیا ہے۔

جے یو آف کے مولانا عطاالرحمان کا کہنا ہے کہ اپوزیشن جماعتیں وزارت اعلیٰ کے انتخاب کے لیے اپنے امیدوار کھڑا کریں گی، کاغذات نامزدگی جمع کرانا آئینی اور قانونی حق ہے، متفقہ امیدوار میدان میں اتارنے کے لیے مشاورتی عمل جاری ہے۔

دوسری جانب مسلم لیگ ن کے ڈاکٹر عباداللہ نے کہا کہ اپوزیشن جماعتوں کی جانب سے امیدوار کاغذات نامزدگی جمع کرائے جائیں گے، وزارت اعلیٰ کے لیے اپوزیشن کی جانب سے مفتقہ امیدوار کھڑا کیا جائے گا۔