راولپنڈی: سیکیورٹی فورسز نے خیبرپختونخوا کے علاقے ٹانک میں انٹیلیجنس بیسڈ آپریشن کرتے ہوئے 8 بھارتی اسپانسرڈ دہشت گردوں کو جہنم واصل کردیا۔

پاک فوج کے شعبۂ تعلقاتِ عامہ (آئی ایس پی آر) کے مطابق سیکیورٹی فورسز نے ٹانک میں خفیہ اطلاع پر ایک انٹیلیجنس بیسڈ آپریشن کے دوران بھارتی پروکسی گروپ فتنہ الخوارج سے تعلق رکھنے والے دہشت گردوں کے ٹھکانے کو نشانہ بنایا۔

آئی ایس پی آر کا کہنا ہے کہ کارروائی دہشت گردوں کی موجودگی کی مصدقہ اطلاع پر کی گئی جس دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔

ترجمان پاک فوج نے بتایا کہ سیکیورٹی فورسز کی بروقت اور مؤثر کارروائی کے نتیجے میں 8 بھارتی اسپانسرڈ خارجی دہشت گرد ہلاک ہوگئے۔ مارے جانے والے دہشت گردوں کے قبضے سے بڑی مقدار میں اسلحہ اور گولہ بارود برآمد کیا گیا ہے۔

آئی ایس پی آر نے کہا کہ ہلاک ہونے والے دہشت گرد علاقے میں سیکیورٹی فورسز، قانون نافذ کرنے والے اداروں اور عام شہریوں پر حملوں میں ملوث تھے۔

ترجمان پاک فوج نے مزید بتایا کہ علاقے کو بھارتی اسپانسرڈ خارجی دہشت گردوں سے مکمل طور پر پاک کرنے کے لیے سینیٹائزیشن آپریشن جاری ہے۔

پاک فوج کے شعبۂ تعلقاتِ عامہ کا کہنا تھا کہ سیکیورٹی فورسز وفاقی ایپکس کمیٹی کے منظور کردہ وژن عزمِ استحکام کے تحت ملک بھر میں انسدادِ دہشت گردی کی کارروائیاں جاری رکھے ہوئے ہیں۔

ترجمان نے مزید کہا کہ پاکستان کی سیکیورٹی فورسز اور قانون نافذ کرنے والے ادارے دہشت گردی کی لعنت کے خاتمے کے لیے پوری قوت کے ساتھ کارروائیاں جاری رکھیں گے۔