لاہور: ملک کی معروف ماہرِ تعلیم اور اردو زبان کی محقق ڈاکٹر عارفہ سیدہ زہرا انتقال کرگئی ہیں۔ علمی و ادبی حلقوں میں ان کے انتقال کی خبر سے گہرا رنج و دکھ پایا جا رہا ہے۔

ڈاکٹر عارفہ سیدہ زہرا طویل عرصے تک فارمن کرسچن کالج لاہور میں بطور پروفیسر آف ہسٹری خدمات انجام دیتی رہیں۔

وہ لاہور کالج برائے خواتین یونیورسٹی کی پرنسپل بھی رہ چکی ہیں اور پنجاب کی نگران حکومت میں صوبائی وزیر کے طور پر بھی اپنے فرائض انجام دے چکی ہیں۔

مرحومہ نے اپنی زندگی اردو زبان، ادب اور جنوبی ایشیائی معاشرتی و فکری پہلوؤں کی ترویج و تحقیق کے لیے وقف کر رکھی تھی۔

وہ نہ صرف ایک ماہرِ تعلیم بلکہ ایک کہنہ مشق دانشور، محقق اور مقررہ بھی تھیں جنہوں نے خواتین کی تعلیم اور قومی سطح پر علمی شعور بیدار کرنے میں نمایاں کردار ادا کیا۔

ڈاکٹر عارفہ سیدہ زہرا قومی کمیشن برائے خواتین کی چیئرپرسن بھی رہ چکی ہیں، جہاں انہوں نے خواتین کے حقوق اور معاشرتی مساوات کے فروغ کے لیے اہم کردار ادا کیا۔

ادبی و تعلیمی حلقوں نے ڈاکٹر عارفہ سیدہ زہرا کے انتقال پر گہرے دکھ کا اظہار کرتے ہوئے کہا ہے کہ ان کی علمی و تدریسی خدمات ہمیشہ یاد رکھی جائیں گی۔

خاندانی ذرائع کے مطابق ڈاکٹر عارفہ سیدہ زہرا کی نمازِ جنازہ کل دوپہر 1:30 بجے جامع مسجد عسکری 5، لاہور میں ادا کی جائے گی۔