صدرِ پاکستان آصف علی زرداری نے کہا کہ ہر فرد کی عزت، مساوات اور انصاف کا تحفظ ہماری بنیادی ترجیح ہے مذہبِ اسلام انسانی وقار، احترامِ انسانیت اور مساوات پر زور دیتا ہے۔
صدرِ مملکت آصف علی زرداری نے انسانی حقوق کے عالمی دن پر پیغام دیتے ہوئے کہا کہ آئینِ پاکستان ہر شہری کو بلا امتیاز آزادی اور بنیادی حقوق کی ضمانت دیتا ہے۔
انہوں نے کہا کہ قائدِ اعظم نے پاکستان کو ہم آہنگی اور وقار کی بنیاد پر ریاست کے طور پر تصور کیا تھا، حکومت انسانی حقوق کے تحفظ اور فروغ کیلئے پُرعزم ہے۔
آصف علی زرداری کا کہنا تھا کہ کمزور اور پسماندہ طبقات کے حقوق کے لیے مزید مضبوط اقدامات کی ضرورت ہے، احترام، برداشت اور باہمی وقار کا ماحول پیدا کرنا وقت کی اہم ضرورت ہے۔
انہوں نے اپنے پیغام اس بات پر زور دیا کہ خواتین، بچوں، اقلیتوں اور خصوصی افراد کو بااختیار بنانا ہماری ذمہ داری ہے، مشترکہ اقدار کے تحفظ کیلئے سول سوسائٹی، اداروں اور شراکت داروں کا کردار اہم ہے۔
صدر زرداری کا کہنا تھا کہ ملک میں انسانی حقوق کے فروغ کیلئے سب کو اپنا کردار ادا کرنا ہوگا، اقوام متحدہ کو عالمی سطح پر اس دن کو منانے پر خراجِ تحسین پیش کرتےہیں۔
آصف علی زردای نے مزید کہا کہ آئیے انسانی وقار کے تحفظ اور مساوات کے فروغ کا عہد کریں، ہر پاکستانی کو خوف، جبر اور امتیاز سے پاک زندگی ملنی چاہیے، اللہ کمزور طبقات کے تحفظ کیلئے ہماری کوششوں کو کامیاب فرمائے۔