پاک بحریہ نے شمالی بحیرۂ عرب میں لائیو ویپن فائرنگ کا کامیاب مظاہرہ کرتے ہوئے سطح آب سے فضا میں مار کرنے والے ایف ایم 90 این ای آر میزائل کا کامیاب تجربہ کیا۔
پاک فوج کے شعبہ تعلقات عامہ (آئی ایس پی آر) کے مطابق اس موقع پر پاک بحریہ کے جنگی جہاز نے انتہائی تیز رفتار فضائی ہدف کو کامیابی سے نشانہ بنایا۔
پاک بحریہ کے مطابق میزائل فائرنگ کے اس کامیاب تجربے سے پاکستان نیوی کی اعلیٰ جنگی تیاری، آپریشنل مہارت اور دفاعی صلاحیتوں کی توثیق ہوتی ہے۔
کمانڈر پاکستان فلیٹ نے سمندر میں جہاز پر موجود رہتے ہوئے لائیو فائرنگ کا مشاہدہ کیا۔
کمانڈر پاکستان فلیٹ نے میزائل فائرنگ کے دوران افسروں اور جوانوں کی پیشہ ورانہ مہارت، عزم اور آپریشنل تیاریوں کو سراہا۔
پاک بحریہ نے اس موقع پر ملکی سمندری سرحدوں کے دفاع اور قومی بحری مفادات کے تحفظ کے عزم کا بھی اعادہ کیا۔