فرانس کے شہر پیرس میں واقع بلندو بالا ایفل ٹاور میں آگ لگنے کی ویڈیو کی حقیقت سامنے آگئی ہے۔

سوشل میڈیا پر ایک ویڈیو کافی وائرل ہوئی ،جس میں دیکھا جا سکتا ہےکہ ایفل ٹاور سے آگ کے شعلے بھڑک رہے ہیں اور یہ کافی حد تک جل چکا ہے۔

اس وائرل ویڈیو کو سوشل میڈیا پر اب تک 4 ملین سے زائد افراد دیکھ چکے ہیں۔

وائرل ویڈیو:

غیر ملکی میڈیا نے اس ویڈیو کے سامنے آنے کے بعد ذمہ داری کا ثبوت دیتے ہوئے کہاکہ  اس خبر میں کوئی صداقت نہیں ہے اور یہ ویڈیو آرٹیفیشل انٹیلی جنس ٹول کی مدد سے بنائی گئی۔

اس خبر کی تردید کرتے ہوئے یہ بھی انکشاف کیا گیا کہ یہ ویڈیو اس سے قبل گزشتہ سال 18 جولائی کو ایک یوٹیوب چینل پر بھی اپ لوڈ کی گئی تھی جس کے کیپشن میں سی جی آئی (کمپیوٹر جنریٹڈ ایمیجنری) بھی لکھا گیا۔

علاوہ ازیں ایفل ٹاور کے آفیشل سوشل میڈیا پلیٹ فارمز پر بھی ایسی کوئی خبر نہیں دیکھی گئی اور نہ ہی دیگر لوگوں نے اس واقع کو رپورٹ کیا۔

ایفل ٹاور

ایفل ٹاور لوہے سے بنے ایک برج کا نام ہے جو فرانس کے شہر پیرس میں دریائے سین کے کنارے واقع ہے۔

اس کا نام اس کو ڈیزائن کرنے والے گستاف ایفل پر رکھا گیا ہے۔

پیرس کا یہ سب سے اونچا برج دنیا میں سب سے زیادہ پہچانی جانے والی یادگار ہے اس کی بلندی 1063 فٹ / 324 میٹر ہے، اسے 1889ء میں مکمل کیا گیا۔

 یہ دنیا کی ایک ایسی جگہ ہے جہاں دنیا بھر سے سب سے زيادہ سیاح آتے ہيں، اس کا وزن 7300 ٹن ہے جبکہ اس میں 1660 سیڑھیاں ہیں اور اوپر جانے کے لیے لفٹ بھی موجود ہے۔