مایہ ناز جنوبی افریقی فاسٹ باؤلر ڈیل اسٹین ٹیسٹ کرکٹ سے ریٹائر  ہوگئے۔

تفصیلات کے مطابق ڈیل اسٹین نے کرکٹ کے طویل ترین فارمیٹ سے ریٹائرمنٹ کا فیصلہ مختصر فارمیٹ میں اپنے کیریئر کو طول دینے کے لئے کیا ہے۔

اسٹین نے 2004ء میں انگلینڈ کے خلاف ٹیسٹ کیریئر کا آغاز کیا اور آخری ٹیسٹ رواں سال فروری میں سری لنکا کے خلاف کھیلا تھا۔

ڈیل اسٹین نے 93ٹیسٹ میچوں میں جنوبی افریقا کی نمائندگی کی اور 22.95کی اوسط سے 439وکٹیں حاصل کرکے ملکی تاریخ کے کامیاب ترین بولر ہونے کا اعزاز پایا۔ ایک اننگز میں اُن کی بہترین بولنگ 51رنز کے عوض 7وکٹیں ہے جبکہ کسی بھی میچ میں ان کی عمدہ بولنگ 60رنز دے کر 11وکٹیں ہے۔

انہوں نے کسی بھی ٹیسٹ میں 10 وکٹیں پانچ مرتبہ جبکہ 20 بار 5 وکٹیں لیں۔

ڈیل اسٹین 2008 سے 2014تک مسلسل ریکارڈ 263 ہفتوں تک ٹیسٹ باؤلنگ رینکنگ میں پہلی پوزیشن پر براجمان رہے۔

ڈیل اسٹین کا کہنا ہے کہ ’’میری رائے میں ٹیسٹ کرکٹ کھیل کا بہترین ورژن ہے، جو آپ کی ذہنی، جسمانی اور جذباتی صلاحیتوں کو آزماتا ہے،کبھی کوئی ٹیسٹ نہ کھیلنے کا تصور بھی بہت مشکل ہے لیکن دوبارہ کبھی نہ کھیل پانے کی سوچ اس سے بھی زیادہ تکلیف دہ ہے لہٰذا اپنے باقی کیریئر میں ون ڈے انٹرنیشنل اور ٹی20 پر فوکس کروں گا۔

کرکٹ ساؤتھ افریقا کے چیف ایگزیکٹو تھبنگ موروئے نے ڈیل اسٹین کو سراہتے ہوئے کہا ہے کہ بلاشبہ وہ کرکٹ کے عظیم کھلاڑی ہیں۔