انگلینڈ کے خلاف  ملائیشیا میں شیڈول سیریز کے لیے پاکستان ویمن کرکٹ ٹیم کا اعلان کردیا گیا ہے۔

چیف سلیکٹر عروج ممتاز نے نیشنل اسٹیڈیم  کراچی میں پریس کانفرنس کرتے ہوئےتین ایک روزہ اور تین ٹی ٹوئنٹی میچز پر مشتمل سیریز کے لیے علیحدہ علیحدہ اسکواڈز کا اعلان کیا ۔

بنگلہ دیش کے خلاف ایک روزہ اور ٹی ٹوئنٹی سیریز  کھیلنے والی ٹیم میں 4،4 تبدیلیاں کی گئی ہیں۔

کائنات حفیظ اور رامین شمیم پہلی بار قومی خواتین ایک روزہ کرکٹ ٹیم کا حصہ بن گئیں جبکہ 15 سالہ لیگ اسپنر عروب شاہ کو پہلی بار ٹی ٹوئنٹی ٹیم میں شامل  کرلیا گیا ہے۔

 بگ بیش میں حصہ لینے والی آل راونڈر ندا ڈار کی دونوں اسکواڈز میں واپسی ہوئی ہے۔

قومی ایک روزہ  اور ٹی ٹوئنٹی خواتین کرکٹ ٹیم کی قیادت بسمہ معروف کریں گی۔

ایک روزہ ٹیم کی دیگر کھلاڑیوں میں عالیہ ریاض، انعم امین، عروب شاہ، ڈیانا بیگ،فاطمہ ثناء،جویریہ خان، کائنات حفیظ، ناہیدہ خان، نشرہ سندھو، ندا ڈار، عمیمہ سہیل،رامین شمیم ،سدرہ امین اور سدرہ نواز شامل ہیں۔

ٹی ٹوئنٹی  اسکواڈ   عالیہ ریاض، انعم امین، عروب شاہ،عائشہ ظفر،ڈیانا بیگ، فاطمہ ثناء، ارم جاوید، جویریہ خان، ناہیدہ خان،ندا ڈار، عمیمہ سہیل، رامین شمیم، سعدیہ اقبال اور سدرہ نواز  پر مشتمل ہے۔

سیریز میں شرکت کے لیے قومی اسکواڈ 30 نومبر کو ملائیشیا روانہ ہوگا۔سیریز کے تمام میچز 9 سے 20 دسمبر تک کنرارا ( اوول )میں کھیلے جائیں گے۔

سیریز میں شامل 3 ایک روزہ میچز آئی سی سی ویمنز چیمپئین شپ کا حصہ ہیں۔