رواں برس  سری لنکن ٹیم کی پاکستان آمد سے ملک میں ٹیسٹ کرکٹ کی بحالی کے بعد 2020 پاکستان میں کرکٹ کی بہار کا موسم ثابت ہونے والا ہے۔

پاکستان کرکٹ بورڈ (پی سی بی ) کے چیف ایگزیکٹو آفیسر(سی ای او) وسیم خان کے مطابق آئندہ برس بنگلہ دیش ، جنوبی افریقہ اور میری لیبون  کرکٹ کلب( ایم سی سی)  کی ٹیمیں  پاکستان آئیں گی۔

وسیم خان نے بتایا کہ بنگلہ دیش کرکٹ بورڈنے دورہ پاکستان کی نوید سنا دی  ہے،رواں ہفتے بنگلہ دیش کرکٹ ٹیم کے دورہ پاکستان کا اعلان متوقع ہے۔

انہوں نے کہا کہ  بنگلہ دیش نے مختصر دورہ کے لیے صرف ٹیسٹ میچ کھیلنے کی خواہش کا اظہار ہے۔سیریز تیس جنوری سے پندرہ فروری تک ہونے کے آپشن پر غور  کیا جا رہا ہے۔

سی ای او وسیم خان نے مزید کہا کہ جنوبی افریقہ سے  بھی بات چیت ہو گئی  ہے۔جنوبی افریقی ٹیم مارچ کے آخر میں پاکستان میں تین ٹی ٹوئنٹی میچز کھیلے گی۔

انہوں نے کہا کہ افریقی  بورڈ کو  دورے کے حتمی اعلان کے لیےکھلاڑیوں کی رضامندی کا انتظار ہے۔

سی ای او پاکستان کرکٹ بورڈ نے مزید کہا کہ ایم سی سی کرکٹ ٹیم  بھی فروری 2020 میں پاکستان کا دورہ کرے گی جس کی قیادت ایم سی سی  کے صدر کمار سنگاکارا کریں گے۔

ایم سی سی ٹیم کت ہیڈ کوچ اجمل شہزاد جبکہ ٹیم منیجر لاوینڈر ہوں گے۔ایم سی سی کرکٹ ٹیم اپنے تمام میچز ایچی سن کالج لاہور میں کھیلے گی۔

وسیم خان نے بتایا کہ کہ ٹیم پاکستان بھجوانے کا فیصلہ ایم سی سی ورلڈ کرکٹ کمیٹی کے اجلاس میں کیا گیا تھا۔ایم سی سی کرکٹ ٹیم کا یہ 46 سال بعد پاکستان کا دورہ ہوگا۔اس سے قبل ایم سی سی کرکٹ ٹیم نے 1973 میں پاکستان کا دورہ کیا تھا۔

چیف ایگزیکٹو پی سی بی  نے کہا کہ ایم سی سی کرکٹ ٹیم کی پاکستان آمد پر خوشی ہے، امید ہے اسکواڈ میں شامل ہر کھلاڑی دورہ پاکستان کے دوران بھرپور لطف اٹھائے گا۔

وسیم خان نے بتایا کہ 2022 میں آسٹریلیا کی ٹیم بھی 2 ٹیسٹ اور 3 ٹی ٹوئنٹی میچز کے لیے پاکستان کا دورہ کرے گی۔پاکستان اے ٹیم پہلے آسٹریلیا کا دورہ کرے گی پھر ان کا دورہ ہو گا۔

انہوں نے مزید کہا کہ کوشش کر رہے ہیں گراس روٹ کرکٹ پر کام کریں۔اس ضمن میں نیو ساؤتھ ویلز کلب سے بھی اسکالر شپ پر بھی بات چیت ہوئی ہے۔نوجوان کھلاڑیوں کو تربیت کے لیے وہاں بھیجا جائےگا۔