چیئر مین پاکستان کرکٹ بورڈ(پی سی بی) احسان مانی کا کہنا ہے کہ اب پاکستان اپنی تمام ہوم سیریز اپنی سرزمین پر ہی کھیلے گا۔

نیشنل اسٹیڈیم کراچی میں پریس کانفرنس کرتے ہوئے چیئر مین پی سی بی احسان مانی  کا کہنا تھا کہ اب  کسی بھی سیریز کے لیے کوئی نیوٹرل وینیو نہیں ہوگا، تمام سیریز اپنی سرزمین پر کھیلیں گے۔

چیئر مین پی سی بی نے کہا کہ راولپنڈی اور کراچی میں ٹیسٹ میچ ہونا بڑا ٹرننگ پوائنٹ ہے۔سری لنکا کا پاکستان آکر ٹیسٹ میچ کھیلنا ہماری بڑی کامیابی ہے۔

احسان مانی نے کہا کہ مختصر سیریز کے لیے پاکستان نہ آنے والےسری لنکن کھلاڑیوں نے افسوس کا اظہار کیا کہ انہیں ٹی ٹوئنٹی اور ون ڈے کھیلنے کے لیے آنا چاہیئے تھا۔وہ یہاں آکر کافی خوش ہوئے ہیں۔

انہوں نے کہا کہ پاکستانی عوام نے ان میچز میں دونوں ٹیموں کو بھرپور انداز سے سپورٹ کیا ہے۔ سری لنکن ٹیم  کے ساتھ اگر کچھ ہوجاتا تو کرکٹ واپس چلی جاتی۔

چیئر مین پی سی بی کا کہنا تھا کہ بنگلہ دیش کرکٹ بورڈ سے رابطے میں ہیں تاہم ان سے ہونے والی بات کو ابھی منظرعام پر لا نہیں سکتے ہیں۔امید ہے کہ وہ  پاکستان نہ آنے کے لیے اب کوئی وجہ نہیں  ڈھونڈیں گے۔

کراچی ٹیسٹ میں کئی منفرد ریکارڈز پاکستان کے نام

احسان مانی نے کہا کہ جو کہتے ہیں کہ وہ سیکیورٹی خدشات پر یہاں نہیں آنا چاہتے تو وہ وضاحت دیں۔بنگلہ دیش یہاں آکر ٹیسٹ سیریز نہیں کھیلے گا تو معاملہ آئی سی سی میں جاسکتا ہے۔

انہوں  مزید کہا کہ پاکستان کرکٹ بورڈ کے معاملات میں کسی کی مداخلت شامل نہیں نہ ہی میرا خود سلیکشن کمیٹی کے معاملات میں  کسی قسم کا کوئی عمل دخل ہے۔

چیئر مین  پی سی بی نے کہا کہ سر فراز پاکستان ٹیم کے کپتان تھے کراچی کے نہیں،وہ فارم میں نہیں تھے،پرفارم کرتے ہی ٹیم میں واپس آجا ئیں گے۔

ان کا کہنا تھا کہ ساری زندگی میں نے محنت سے کام کیا ہے۔ آئی سی سی  کے ساتھ بھی کافی عرصے سے منسلک رہا ہوں۔ہمارے لیے بڑا چیلنج پاکستان ٹیم کی کامیابی کا تسلسل برقرار رکھوانا ہے، ہم پر تنقید ضرور کی جائے لیکن حقائق جاننا بھی لازمی  ہیں۔

احسان مانی نے مزید کہا کہ ہمیں ایسی وکٹیں تیار کرنا پڑیں گی جن پر کھیل کر غیر ملکی دورے پر مسئلہ نہ ہو۔

چیئر مین پی سی بی نے کہا کہ پوری کوشش تھی کہ انگلینڈ ویمنز ٹیم پاکستان میں کھیلے تاہم انگلش بورڈ نے پہلے مینز ٹیم کو پاکستان بھیجنے کی خواہش ظاہر کی تھی۔

انہوں نے کہا کہ آسٹریلیا کے کرکٹ بورڈ کے ہیڈ آئے اور انگلینڈ بورڈ کے چیف آئے انہوں نے بھی سیکیورٹی کی تعریف کی۔