پاکستان کے ابھرتے ہوئے نوجوان فاسٹ بالر حارث رؤف کی آسٹریلوی ٹی ٹوئنٹی لیگ بگ بیش میں شاندار کارکردگی کا سلسلہ جاری ہے۔

تفصیلات کے مطابق پاکستان سپر لیگ میں لاہور قلندرز کی نمائندگی کرنے والے حارث رؤف ان دنوں آسٹریلوی سرزمین پر  اپنی تیز رفتار بالنگ کے ذریعے کامیابی کے جھنڈے  گاڑنے میں مصروف ہیں۔

بگ بیش لیگ میں میلبرن اسٹارز کی نمائندگی کرنے والے حارث رؤف نے  آج سڈنی تھنڈرز کے خلاف 24 رنز کے عوض تین وکٹیں حاصل کرکے ٹیم کی جیت میں اہم کردار ادا کیا۔

اس طرح ان کی بگ بیش لیگ کے صرف تین میچز میں وکٹوں کی کل تعداد دس  ہوگئی ہے اور وہ رواں سیزن کے اب تک سب سے وکٹیں لینے والے بالر بن گئے ہیں۔

اس سے قبل حارث رؤف نے اپنے بگ بیش لیگ کے پہلے میچ میں 20 رنز کے عوض 2 جبکہ دوسرے میچ میں 27 رنز کے بدلے 5 وکٹیں حاصل کی تھیں۔

واضح رہے کہ پاکستانی فاسٹ بالر کوجنوبی افریقی فاسٹ بالر ڈیل اسٹین   کے انجرڈہونے کے سبب ٹیم میں شامل کیاگیا تھا جسے انہوں نے اپنی شاندار کارکردگی سے درست فیصلہ ثابت کیا۔

دو میچز کے بعد ڈیل اسٹین کی واپسی  ہوئی تو حارث رؤف کی ٹیم میں جگہ نہ بن سکی  تاہم آج کے میچ میں نیپالی اسپنر سندیپ لمیچانے کے انجرڈ ہونے پر انہیں دوبارہ ٹیم میں شامل کیا گیا اور انہوں نے ایک بار پھر تباہ کن بالنگ کرکے اپنی ٹیم کو کامیابی دلوادی۔