سابق آسٹریلوی آل راؤنڈر شین واٹسن نے پاکستانیوں کے لیے اردو زبان میں پیغام جاری کرکے سب کو حیران کردیا۔

تفصیلات  کے مطابق سماجی رابطے کی ویب سائٹ ٹوئیٹر پر جاری ویڈیو میں آسٹریلوی آل راؤنڈر  شین واٹسن نے پاکستانیوں کے لیے اردو زبان میں پیغام جاری کیا۔

پاکستان سپر لیگ میں کوئٹہ گلیڈی ایٹرز کی نمائندگی کرنے والے آل راؤنڈر شین واٹسن نے پاکستان سپر لیگ کے پانچویں سیزن میں شرکت کے  لیے پاکستان آنے کا ایک ویڈیو پیغام جاری   کیا۔

انہوں نےویڈیو پیغام میں کہا کہ’پاکستانیوں میں آرہا ہوں،آپ سب پرپل فورس کو سپورٹ کریں، اس بار ہوگا کوئٹہ کوئٹہ‘۔

واضح رہے کہ شین واٹسن  نے گذشتہ سیزن میں کوئٹہ گلیڈی ایٹرز کی جانب سے سب   زیادہ رنز اسکور کیے تھے اور اپنی ٹیم کو ٹائٹل جتوانے میں اہم کردار ادا کیا تھا۔

https://www.bolnews.com/urdu/sports/2020/01/870979/amp/

یاد رہے کہ 2017 میں سیکیورٹی خدشات کے باعث  کیون پیٹرسن کے بعد شین واٹسن نے بھی پاکستان آنے سے انکار کردیا تھا جس کے باعث کوئٹہ کو فائنل میں شکست ہوگئی تھی۔

تاہم 2019 میں شین واٹسن نہ صرف یہ کہ پاکستان آئے بلکہ اپنی ٹیم کو ٹائٹل جتوانے میں بھی اہم کردار ادا کیا۔اور اب ایک بار پھر وہ پی ایس ایل کے سیزن فائیو میں شرکت کے لیے پاکستان آنے کے لیے بیتاب ہیں۔

خیال رہے کہ یہ پہلا موقع ہے کہ جب پی ایس ایل کے تمام میچز پاکستان  میں کھیلے جائیں گے۔

چونتیس میچوں پر مشتمل ایونٹ کے 14 میچز قذافی اسٹیڈیم لاہور ، 9 نیشنل اسٹیڈیم کراچی، 8 پنڈی کرکٹ اسٹیڈیم راولپنڈی اور 3 ملتان کرکٹ اسٹیڈیم میں کھیلے جائیں گے۔

پی ایس ایل 2020 کا افتتاحی میچ دفاعی چیمپئن کوئٹہ گلیڈی ایٹرز اور دو مرتبہ کی چیمپئن اسلام آباد یونائیٹڈ کی ٹیموں کے درمیان نیشنل اسٹیڈیم کراچی میں کھیلا جائے گا۔

لیگ کے پانچویں ایڈیشن کا فائنل 22 مارچ کو قذافی اسٹیڈیم لاہور میں ہوگا۔