دورہ نیوزی لینڈ پر موجود بھارتی کرکٹ ٹیم  ان دونوں جرمانوں   کی زد میں ہے، بھارتی ٹیم پر مسلسل تیسری مرتبہ جرمانہ عائد کردیا گیا۔

تفصیلات کے مطابق ہیملٹن میں کھیلے گئے تین ایک روزہ میچز کی سیریز کے پہلے  میچ میں سلو اوور ریٹ پر بھارتی ٹیم  پر جرمانہ  عائد کر دیا گیا۔

بھارتی کرکٹ ٹیم نے مقررہ وقت میں  4اوورز کم کیے اور وقت  الاؤنس  ملنے کے باوجود بھارتی ٹیم 50اوورز مکمل نہ کر سکی جس پر اسے جرمانہ کیا گیا۔

انٹر نیشنل کرکٹ کونسل( آئی سی سی )  کے میچ ریفریز کے ایلیٹ  پینل میں شامل کرس براڈ نے ویرات کوہلی کی ٹیم پر میچ فیس کا 80فیصد جرمانہ عائد کیا۔

آئی سی سی ضابطہ کار کے تحت مقررہ وقت میں اوور زمکمل نہ کرنے پر بولنگ سائیڈ کے کھلاڑیوں  پر جرمانہ عائد کیا جاتا ہے۔

آئی سی سی کوڈ آف کنڈٹ کے تحت بولنگ ٹیم کے کپتان سمیت ہر کھلاڑی کو مقررہ وقت میں ایک اوور کم کرنے پر میچ فیس کی 20 فیصد کٹوتی کی جاتی ہے جبکہ بھارتی ٹیم نے میچ میں 4اوورز کم کیے جس بناء پر 80فیصد جرمانہ کیا گیا۔

ٹیلر کی ناقابل شکست سنچری، نیوزی لینڈ نے بھارت کو شکست دے دی

بھارتی کپتان  ویرات کوہلی نے اپنی غلطی کا اعتراف کرتے ہوئے میچ ریفری کی جانب سے کیے گئے 80فیصد میچ فیس کے جرمانے کو قبول کرلیا  جس کے بعد باقاعدہ سماعت کی ضرورت نہیں رہی۔

واضح رہے کہ یہ اس دورے کا مسلسل تیسرا میچ ہے جس میں بھارتی ٹیم کو مقررہ وقت میں اوورز مکمل نہ کرنے پر جرمانہ عائد کیا گیا ہے۔

اس سے قبل ٹی ٹوئنٹی سیریز کے چوتھے اور پانچویں میچ  میں  بھی بھارتی ٹیم پر جرمانے عائد کیے گئے تھے۔

یاد رہے کہ  آج کھیلے گئے پہلے ایک روزہ میچ میں نیوزی لینڈ نے بھارت کو 4 وکٹوں سے شکست دے کر سیریز میں 0-1 کی برتری حاصل کرلی  ہے ۔

دونوں ٹیموں کے مابین دوسرا ایک روزہ میچ 7 فروری کو آکلینڈ میں کھیلا جائے گا۔