ویسٹ انڈیز کے مایہ ناز بیٹسمن کرس گیل نے ساتھی کرکٹر رام نریش سروان کو  کورونا وائرس سے بدتر قرار دے دیا۔

 تفصیلات کے مطابق اپنے ویڈیو پیغام میں کرس گیل نے الزام لگایا کہ کیریبئن  پریمیئر لیگ کی ٹیم سے مجھے سروان کی وجہ سے نکالا گیا۔

جارح مزاج بلے باز کرس گیل نے کہا کہ  سروان  خود کو فرشتہ ظاہر کرتا ہے لیکن حقیقت میں وہ سانپ اور شیطان ہے۔

انہوں نے مزید کہا کہ میں ایمانداری سے بتارہا ہوں کہ تم کورونا وائرس سے بھی بدتر ہو۔سروان تم وہ ہوجس نے میری جمیکا میں ہونے والی سالگرہ پر بڑی تقریر کی تھی۔

کرس گیل نے کہا کہ  سروان تم سانپ ہو۔ تم جانتے ہو کہ کیریبئن میں تمہیں کوئی پسند نہیں کرتا،تم ابھی تک ناسمجھ ہو۔تم لوگوں کے پیچھے باتیں کرتے ہو،تم خبریں بناتے ہو،تم کب بدلو گے سروان ؟

واضح رہے کہ کرس گیل اور رام نریش سروان نے کئی انٹرنیشنل میچز میں اکٹھا ویسٹ انڈیز کی نمائندگی کی ہے اور دونوں 2012 کا ورلڈ ٹی ٹوئنٹی  جیتنے والی ٹیم کا  بھی حصہ تھے۔