کورونا وائرس کے سبب متبادل کھلاڑیوں کا مطالبہ زور پکڑنے لگا۔

تفصیلات کے مطابق انگلینڈ کرکٹ بورڈ( ای سی بی) نے انٹر نیشنل کرکٹ کونسل (آئی سی سی )سے  کورونا وائرس کے سبب میچ کے دوران  متبادل کھلاڑیوں کا مطالبہ کردیا۔

موجودہ صورتحال میں اب کووڈ 19 متبادل کھلاڑی اجازت دینے کی بات کی جا رہی ہے ۔ای سی بی نے آئی سی سی سے کہا  ہے کہ میچ کے دوران کورونا کی علامات ظاہر ہونے والے کھلاڑی کا متبادل ٹیم میں شامل ہونا چاہیے۔

لیکن کووڈ 19 ری پلیسمنٹ پلیئرز کے حوالے سے طریقہ کار تاحال سامنے نہیں آیا ہے۔

انگلینڈ کرکٹ بورڈ نے آئی سی سی سے قوانین میں تبدیلی کے لیے رابطہ کیا ہے اور پاکستان اور ویسٹ انڈیز کے خلاف ٹیسٹ سیریز سے قبل قوانین میں تبدیلی کے لیے پر امید ہے۔

ڈائریکٹر ای سی بی اسٹیو ایلورتھی کا کہنا ہے کہ کووڈ 19 کی وجہ سے آئی سی سی یقینی طور متبادل پہلوؤں کے بارے میں سوچ رہا ہے۔

انہوں نے مزید کہا کہ تبدیلیوں کے حوالے سے رضا مند ہونے کی ضرورت ہے، یہ سب ٹیسٹ کرکٹ کے لیے ہے، امید ہے کہ جولائی میں ٹیسٹ سیریز سے قبل فیصلہ ہو جائے گا۔

واضح رہے کہ آئی سی سی نے میچ کے دوران اب تک صرف متبادل  فیلڈر کی اجازت دے رکھی ہے جبکہ کوئی متبادل کھلاڑی بیٹنگ یا بالنگ نہیں کرسکتا۔