پاکستان ہاکی کے سابق کپتان و اولپمپیئن اسد ملک ٹریفک حادثے میں انتقال کرگئے۔

تفصیلات کے مطابق پاکستان ہاکی کے سابق کپتان و اولپمپیئن اسد ملک گذشتہ رات ایک ٹریفک حادثے میں جاں بحق ہوگئے جبکہ ان کی اہلیہ بھی شدید زخمی ہوئیں۔

اسد ملک کا تعلق ہاکی کھیلنے والی فیملی سے ہے ۔ان کے چھوٹے بھائی سعید انور کے علاوہ بھتیجے انجم سعید اور نعیم امجد بھی اولمپکس میں پاکستان کی نمائندگی کر چکے ہیں۔

اسد ملک کی فیملی پاکستان کی واحد فیملی ہے جس کے 4 افراد نے اولمپکس میں پاکستان کی نمائندگی کی ہے۔

اسد ملک 1968 کے اولمپکس میں گولڈ میڈل   حاصل کرنے والی ٹیم کا حصہ تھے۔اس کے علاوہ انہوں نے 1964 اور 1972 کے اولمپکس میں سلور میڈل بھی جیتا تھا۔

اسد ملک نے ایشین گیمز میں دو گولڈ کے علاوہ ایک سلور میڈل بھی جیتا۔ 1962ء کی جکارتہ ایشین گیمز میں پاکستانی ٹیم نے گولڈ میڈل جیتا تھا جس میں اسد ملک بھی شریک تھے۔

سابق اولمپیئن میونخ اولمپکس 1972 کا سلور میڈل، بنکاک میں ہونے والی ایشین گیمز 1966 کا سلور میڈل اور بنکاک میں ہی ہونے والے ایشین گیمز 1970 کا گولڈ میڈل جیتنے والی پاکستان ہاکی ٹیم کا بھی حصہ تھے۔

اس کے علاوہ جب پاکستان نے 1971 میں پہلا ہاکی ورلڈ کپ جیتا تو اس وقت اسد ملک ٹیم کے نائب کپتان تھے۔