بھارتی کرکٹ ٹیم کو ایک روزہ ورلڈکپ ،ٹی ٹوئنٹی ورلڈکپ اور چیمپئنز ٹرافی جتوانے والے سابق کپتان مہندرا سنگھ دھونی نے انٹرنیشنل کرکٹ سے ریٹائرمنٹ کا اعلان کردیا۔

تفصیلات کے مطابق سابق بھارتی کپتان ایم ایس دھونی نے ریٹائرمنٹ کا اعلان اپنے انسٹا گرام اکاؤنٹ پر کیا  ۔

ایم ایس دھونی نے لکھا کہ آپ سب کی محبتوں اور حمایت کا شکریہ۔

یاد رہے کہ سابق بھارتی کپتان ایم ایس دھونی نے 2004 میں بنگلا دیش کے خلاف ایک روزہ میچ سے اپنے انٹرنیشنل کیریئرکا آغاز کیا تھا۔

سابق کپتان نے 350 ایک روزہ، 90 ٹیسٹ اور 92 ٹی ٹوئنٹی انٹرنیشنل مقابلوں میں بھارتی ٹیم کی نمائندگی کی ہے۔ایم ایس دھونی نے 2014 میں ہی ٹیسٹ کرکٹ چھوڑ دی تھی۔

دھونی نے جولائی 2019 میں ورلڈ کپ کے دوران نیوزی لینڈ کے خلاف اپنا آخری ایک روزہ میچ کھیلا تھا جس کے بعد سے دھونی انٹرنیشنل کرکٹ سے دور تھے۔

ایک سال سے زائد کا عرصہ گزرنے کے بعد ایم ایس دھونی نے آج انٹرنیشنل کرکٹ سے ریٹائرمنٹ کا اعلان کیا ہے۔

ایم ایس دھونی بھارتی تاریخ کے سب سے کامیاب کپتان مانے جاتے ہیں۔