جاپان نے اولمپکس گیمز 2021 کے دوبارہ منسوخی کے امکان کو مسترد کردیا ہے۔

تفصیلات کے مطابق جاپان نے اولمپکس 2021 کے حوالے سے کہا ہے کہ کورونا وائرس کے متاثرین میں اضافے کے باوجود ایسے حالات نہیں ہیں کہ اولمپکس گیمز دوبارہ منسوخ کیے جائیں۔

ٹوکیو کی گورنر یوریکو کوئیکے نے  اپنے ایک انٹرویو میں خبردار کیا کہ اولمپکس دوبارہ منسوخ ہونے سے دیگر بین الاقوامی کھیلوں کا مستقبل بھی متاثر ہوگا، جن میں بیجنگ میں ہونے والی ونٹر گیمز 2022 اور پیرس کی سمر گیمز 2024شامل ہیں۔

یاد رہے کہ اولمپکس جولائی 2020 میں جاپان کے دارالحکومت ٹوکیو میں منعقد ہونا تھے جو کورونا کی عالمی وبا ءکے باعث ملتوی کر دیے گئے تھے۔

تاریخ میں پہلی مرتبہ اولمپکس گیمز منسوخ کی گئی تھیں جو جولائی 2021 میں منعقد کرنے کا فیصلہ کیا گیا ہے۔

گورنر یوریکو کوئیکے نے اعتراف کیا کہ موجودہ حالات کے باعث جاپان کے شہریوں کی اکثریت کھیلوں کی میزبانی کرنے کی مخالف ہے تاہم حکومت مستقبل کے حالات کا مقابلہ کرنے کی تیاری کر رہی ہے۔

انہوں نے کہا کہ ٹوکیو میں اتنی بڑی سطح پر کھیل منعقد ہونے سے دنیا کو یہ پیغام جائے گا کہ انسانیت نے کورونا وائرس کو شکست دے دی ہے، جس کے بعد بیجنگ ونٹر گیمز اور پیرس سمر گیمز منعقد ہونے کی راہ بھی ہموار ہو جائے گی۔

نئے شیڈول کے مطابق جاپان کے دارالحکومت ٹوکیو میں 23 جولائی سے 8 اگست 2021 تک اولمپکس گیمز منعقد ہوں گی۔

جون میں جاپانی حکام اور انٹرنیشنل اولمپک کمیٹی نے پہلے ہی خبردار کر دیا تھا کہ گیمز دوبارہ ملتوی کرنا ممکن نہیں ہوگا، ایک برس کی تاخیر سے پہلے ہی بھاری مالی نقصان ہو چکا ہے۔