قومی ٹیسٹ کرکٹر اظہر علی کا کہنا ہے کہ نیل ویگنر نے ہم سب کے لیے ایک مثال قائم کی ہے۔

ماؤنٹ منگنوئی میں جاری پہلے ٹیسٹ میچ کے چوتھے روز کے اختتام کے بعد اپنے پیغام میں اظہر علی کا کہنا تھا کہ  نیوزی لینڈ کے بالر نیل ویگنر نے ہم سب کے لیے ایک مثال قائم کی ہے۔

انہوں نے کہا کہ  انجری کے باوجود کھیلنے پر ہم نیل ویگنر کی بہت عزت کرتے ہیں۔ وہ فریکچر کے باوجود میچ کھیل رہے ہیں، جو قابل ستائش ہے۔

اظہر علی نے مزید کہا کہ نیل ویگنر نے یہ ثابت کردیا کہ  اپنے ملک کی نمائندگی سے بڑھ کر کچھ نہیں۔

میچ کی صورتحال سے متعلق بات کرتےہوئے انہوں نے کہا کہ  کل کا پہلا سیشن بہت اہم ہوگا۔  ہمارا پلان یہی ہے کہ جو بیٹسمین سیٹ ہوجائے وہ اس پچ پر زیادہ وقت گزاریں۔

اظہر علی نے کہا کہ پانچویں دن اس پچ پر اسپنر کو مدد مل سکتی ہے،  پچ پر پرانا گیند تھوڑا رک کر آرہا ہے۔ کوشش کروں گا کہ فواد عالم کے ساتھ ایک لمبی پارٹنرشپ قائم کرسکوں۔