قومی کرکٹ ٹیم کے بیٹنگ کوچ یونس خان کا کہنا ہے کہ  ‏ فہیم اشرف اچھے بالنگ آل راؤنڈر  بننے کی صلاحیت رکھتے ہیں۔

بیٹنگ کوچ یونس خان کا کہنا تھا کہ  ‏فہیم اشرف ایک  آل راؤنڈر کا کردار ادا کر رہے ہیں،  امید ہے فہیم اشرف عمدہ کارکردگی کا سلسلہ جاری رکھیں گے۔

یونس خان نے کہا کہ ‏ ٹاپ آرڈر  سے رنز نہیں ہو ئے لیکن انہوں نے کریز پر وقت ضرور گزارا۔ ٹاپ آرڈر میں ‏ایک اچھی پارٹنر شپ ہو جاتی تو ابھی صورتحال مختلف ہوتی۔

انہوں نے کہا کہ  فہیم اشرف کے لیے اسٹیج تیار تھا، جب وہ کریز پر پہنچے تو پچاس اوورز ہو چکے تھے۔‏محمد رضوان کی جتنی تعریف کی جائے کم ہے۔محمد رضوان انگلینڈ میں بھی اچھا کھیلے، ان کی آج کی اننگز بالکل مختلف تھی۔

بیٹنگ کوچ کا کہنا تھا کہ  ‏محمد رضوان ایک میچور اور سینئر کھلاڑی کے روپ میں نظر آ رہے ہیں،   وہ اسی طرح کھیلتے رہے تو پاکستان کو بہت فائدہ ہوگا۔

یونس خان نے کہا کہ  کپتان کی اپنی کارکردگی بہت  اہمیت رکھتی ہے، پرفارمنس اچھی ہو تو فیلڈ میں فیصلے بھی  اچھے ہوتے ہیں۔

انہوں نے مزید کہا کہ ‏  کھیل کے دوسرے روز شان مسعود کا آؤٹ ہونا  پاکستان ٹیم کے لیے بدقسمت رہا، تیسرے روز ناٹ آؤٹ سیٹ بیٹسمین  کھیل رہے ہوتے تو بہت فائدہ ہوتا۔‏

بیٹنگ کوچ نے کہا کہ پارٹنر شپ لگنے سے دوسری ٹیم پر دباؤ ہوتا ہے۔ ‏ اگر اننگز میں سو رنز کی دو سے تین پارٹنر شپ ہو جائیں تو بہت فائدہ ہوجاتا ہے۔‏ نیوزی لینڈ کی اننگز میں بھی اسی طرح ہوا، انہوں نے ایک لمبی اور دو چھوٹی چھوٹی پارٹنر شپ لگائیں اور  چارسو رنز بنالیے۔