پاکستانی کرکٹ فینز  کے لیے بڑی خبر، پاکستان نے آئی سی سی ورلڈ کپ اور  ٹی ٹوئنٹی ورلڈکپ کی میزبانی  کے لیے کوششیں شروع کردیں۔

تفصیلات کے مطابق  پاکستان نے آئی سی سی ایونٹس کی میزبانی کےلیے کوششیں شروع کردیں۔ 2023 سے 2031 کے درمیان  ورلڈ کپ اورٹی ٹوئنٹی ورلڈکپ سمیت آٹھ ایونٹس کے لیے پروپوزل دیے جائیں گے۔

چیف ایگزیکٹوپی سی بی وسیم خان  کہتے ہیں کہ اکتوبر میں ہم 8 بڑے ایونٹس کی میزبانی  کے لیے پرپوزل جمع کروائیں گے۔   اگلے فیوچر ٹور پروگرام  کے لیے تمام ٹیموں  کے ساتھ ہوم سیریز پلان کر رہے ہیں۔

وسیم خان نے کہا کہ  پاک افریقہ سیریز پہلی مرتبہ پاکستان کی ہوم سیریز پوری دنیا میں براڈ کاسٹ ہوگی ۔14 برس بعد جنوبی افریقہ کا پاکستان میں کھیلنا  ایک جذباتی لمحہ ہے ۔  پاکستان   کرکٹ بورڈ اور  فینز کے لیے یہ تاریخی اور یادگار لمحات ہیں ۔

انہوں نے کہا کہ پاکستان کرکٹ کو دنیا بھر میں پزیرائی مل رہی ہے ۔ دنیا بھر میں اس کا ٹیلی کاسٹ ہونا اس بات کا ثبوت ہے۔

پاکستان سپر لیگ سے متعلق چیف ایگزیکٹو کا کہنا تھا کہ سپر لیگ فرنچائزز نے پیسے جمع کرا دیے ہیں، ایونٹ دھوم دھام سے شروع ہوگا۔

وسیم خان نے کہا کہ  تنقید کا سلسلہ چلتا رہتا ہے ،چیف ایگزیکٹو اور چیئر مین بھی اپنا کام کررہے ہیں۔ ہم اپنی کوشش میں اچھی گورننس کے ساتھ کام کر رہے ہیں ۔

انہوں نے مزید کہا کہ  ٹیم کی کارکردگی   کی  وجہ سے مایوسی ہونا فطری بات ہے۔ کرکٹ فینز پاکستان  ٹیم کی کامیابی کو دیکھنا چاہتے ہیں، جب  کامیابی نہیں  ملتی تو سب کو دکھ ہوتا ہے۔

سی ای او پی سی بی نے کہا کہ تنقید ہر بورڈ پر ہوٹی ہے اس کا کوئی ایشو نہیں ہے ،تنقید ہونا فطری بات ہے۔ ہم نے سسٹم تبدیل کیا نتائج آنے میں وقت لگے گا ۔

وسیم خان نے کہا کہ کرکٹرز اور کوچز محنت کر رہے ہیں ،ہم  کوچز کو بیک کر رہے ہیں۔ ہمیں یقین ہے کہ ہم پاکستان کرکٹ  میں ضرور مثبت تبدیلی لائیں گے ۔