ڈھاکہ: پاکستان اور بنگلا دیش کے درمیان جاری تیسرے ٹی ٹوئنٹی میچ میں ڈیبیو کرنے والے قومی فاسٹ بولر شاہ نواز دھانی نے اپنے کیریئر کی پہلی وکٹ حاصل کرلی ہے۔

پاکستان اور بنگلادیش کے درمیان تیسرا ٹی ٹوئنٹی میچ جاری ہے جس میں ڈیبیو کرنے والے قومی فاسٹ بولر شاہ نواز دھانی نے اپنے کیریئر کی پہلی وکٹ حاصل کی ہے جبکہ شاہ نواز دھانی نے یورکر بول کرواکر بنگلادیش کے اوپنر کھلاڑی نجم الحسین شنٹو کو 5 رنز پر آوٹ کیا ہے۔

دوسری جانب پی سی بی نے پلیئنگ الیون کا حصہ بننے والے شاہ نواز دھانی کی ایک ویڈیو بھی جاری کی ہے جس میں وہ اپنی والدہ کو میچ کھیلنے کی نوید سناکر دعائیں لےرہے ہیں۔

لاڑکانہ سے تعلق رکھنے والے دھانی  پاکستان کے پچانوے اور لاڑکانہ کے پہلے کھلاڑی ہیں جو ٹی ٹوئنٹی میں پاکستان کی نمائندگی کررہے ہیں ۔

اس موقع پر شاہ نواز دھانی کا کہنا تھا کہ پاکستان کی طرف سے کھیلنا ہر کھلاڑی کی خواہش ہوتی ہے، جب سے میچ کھییلنے کا سنا ہے تو رات بھر نیند نہیں آئی۔

دھانی نے شین بونڈ کو اپنا فیورٹ بولر قرار دیتے ہوئے کہا کہ اب تک پی ایس ایل کا بہترین بولربننا میرے لیے یادگار لمحات ہیں اور ڈبیو میچ میں مین آف دی میچ بننے کی  خواہش ہے۔

دھانی کا مزید کہنا تھا کہ کھیتی باڑی سے  انٹرنیشنل میدان میں پاکستان کی طرف سے کھیلنے کا سفر بہت محنت طلب رہا ہے، والدین سمیت سب نے بہت سپورٹ کیا ہے۔

دھانی کا مزید کہنا تھا کہ اپنی سرزمین پر پہلا میچ کھیلنے کو ملتا تو زیادہ لطف آتا تاہم ملنے والے اس موقع میں بہترین پرفارمنس دے کر سب کے دل جیتنے کی کوشش کروں گا۔