چٹاگانگ: پہلے ٹیسٹ میچ کے لیے بنگلادیش کے خلاف پاکستان نے 12 رکنی ٹیم اسکواڈ کا اعلان کردیا ہے۔

تفصیلات کے مطابق 26 نومبر سے چٹاگانگ کے ظہور احمد چوہدری اسٹیڈیم میں پاکستان اور بنگلادیش کے درمیان ٹیسٹ سیریز کے پہلے ٹیسٹ میچ کا آغاز ہورہا ہے جس کے لیے پاکستان نے 12 رکنی ٹیم اسکواڈ کا اعلان کیا ہے۔

پاکستانی ٹیسٹ اسکواڈ میں کپتان بابر اعظم، نائب کپتان و وکٹ کیپر محمد رضوان، عبداللہ شفیق، عابد علی، سابق کپتان اظہر علی اور فہیم اشرف کو شامل کیا گیا ہے۔

علاوہ ازیں قومی ٹیسٹ اسکواڈ میں فواد عالم، حسن علی، امام الحق، نعمان علی، ساجد خان اور شاہین شاہ آفریدی کو شامل کیا گیا ہے۔

واضح رہے کہ پاکستان اور بنگلادیش کے درمیان دو ٹیسٹ میچز پر مشتمل سیریز ہوگی جس کا دوسرا میچ 4 دسمبر سے شیر بنگلہ کرکٹ اسٹیڈیم ڈھاکہ میں شروع ہوگا۔

دوسری جانب شکیب الحسن ہیم اسٹرنگ انجری سے چھٹکارا نہ پا سکے جس کی وجہ سے وہ پاکستان کے خلاف پہلے ٹیسٹ میچ سے باہر ہو گئے ہیں۔

اس سے قبل شکیب الحسن کا نام پہلے ٹیسٹ کے لئے ٹیم اسکواڈ میں شامل کیا گیا تھا اور ٹیم میں شمولیت فٹنس سے مشروط قرار دی گئی تھی۔

یاد رہے کہ بنگلادیش کے درمیان 3 ٹی ٹوئنٹی میچز پر مشتمل سیریز کھیلی گئی جس میں پاکستان نے شاندار کارکردگی کا مظاہرہ کرتے ہوئے بنگلادیش کو کلین سوئپ کردیا تھا۔