قومی کرکٹ ٹیم کے کپتان بابر اعظم کا کہنا ہے کہ اس وقت پاکستان ٹیم کا اچھا مومنٹم بنا ہوا ہے لیکن بنگلادیش کی ہوم سیریز میں انہیں آسان نہیں لیا جاسکتا۔

قومی کرکٹ ٹیم کے کپتان بابر اعظم کا ورچوئل پریس کانفرنس کرتے ہوئے کہنا تھا کہ سینئر کھلاڑیوں کے نہ ہونے کے باوجود جو کھلاڑی شامل ہیں انہیں بنگلادیش کی پریمئر لیگ کھیلنے کا تجربہ ہے۔

بابر اعظم کا کہنا تھا کہ سیمی فائنل ہارنے کا دکھ ہے اور ہر کسی کو افسوس ہوا ہے لیکن اس وقت ٹیم کا مومنٹم بنا ہوا ہے اور اسی کو برقرار رکھنے کی کوشش کریں گے، کھلاڑیوں کو اعتماد میں لے کر بیک کیا ہے اس لیے مومنٹم کو برقرار رکھنے کی کوشش کررہے ہیں۔

کپتان بابر اعظإ کا مزید کہنا تھا کہ ڈھاکہ میں سیریز کی تیاری جتنا موقع ملا اس سے فائدہ اٹھانے کی کوشش کریں گے، ہماری کوشش یہی ہے کہ ورلڈ کپ کی طرح یہاں بھی اچھا کھیل پیش کریں۔

واضح رہے کہ بنگلادیش کے خلاف پہلا ٹی ٹوئنٹی میچ کل ڈھاکہ کے شیرے بنگلا کرکٹ اسٹیڈیم میں پاکستانی وقت کے مطابق سہہ پہر 1 بجے کھیلا جائے گا جبکہ اس میچ کے لیے قومی ٹیم کے 12 رکنی اسکواڈ کا اعلان بھی کردیا گیا ہے۔

پی سی بی کی جانب سے  سماجی رابطے کی ویب سائٹ ٹوئٹر پر جاری کردہ فہرست کے مطابق بابر اعظم کپتانی کے فرائض انجام دیں گے جبکہ نائب کپتان شاداب خان مقرر کیے گئے ہیں۔

اسکے علاوہ ٹیم میں خوشدل شاہ، فخر زمان، حیدر علی، حارث رؤف، حسن علی، محمد نواز، محمد وسیم جونیئر، شاہین شاہ آفریدی سمیت شعیب ملک اور بطور وکٹ کیپر محمد رضوان کو شامل کیا گیا ہے۔