کورونا کی نئی قسم اومی کرون کی شدت کو مد نظر رکھتے ہوئے جنوبی افریقا میں کامن ویلیتھ ریسلنگ چیمپئن شپ ملتوی کردی گئی۔

جنوبی افریقا کے شہر پریٹوریا میں 2 دسمبر سے کامن ویلیتھ ریسلنگ چیمپئن شپ شروع ہونا تھی، جس میں پاکستان سمیت دولت مشترکہ ممالک سے ریسلرز کو شرکت کرنی تھی۔ پاکستان کی جانب سے عالمی شہرت یافتہ انعام بٹ سمیت 8 ریسلر کو ایونٹ میں شرکت کرنا تھی، تاہم کورونا کی نئی قسم اومی کرون کے پیش نظر ایونٹ کو ملتوی کردیا گیا ہے۔

منتطمین کے مطابق مختلف ملکوں کی جانب سے لگائی گئی سفری پابندیوں کے باعث چیمپئن شپ کو ملتوی کیا گیا ہے، کامن ویلتھ ریسلنگ چیمپئن شپ کی نئے شیڈول کا اعلان جلد ہی کیا جائے گا۔

واضح رہے کہ اومی کرون کے باعث دنیا بھر میں ایک مرتبہ پھر تشویش کی لہر دوڑ گئی ہے، کئی ملکوں نے جنوبی افریقا سمیت 6 ملکوں پر سفری پابندیاں عائد کردی ہیں، اسی وجہ سے زمبابوے میں ہونے والی آئی سی سی ویمن ورلڈ کپ کوالیفائرز کو بھی 2 روز قبل منسوخ کردیا گیا، کوالیفائرز میں پاکستان کی ویمن کرکٹ ٹیم بھی شریک تھی جو گزشتہ روز وطن واپیس کے لیے ہرارے سے نمیبیا پہنچی ہے۔