پاکستان کرکٹ بورڈ نے افریقی ممالک میں کورونا وائرس کے نئے ویرینٹ کے پیش نظر ہرارے میں موجود پاکستان ویمن ٹیم کو محتاط رہنے کی خصوصی ہدایات جاری کی ہیں۔

بول نیوز کے مطابق پاکستان کی قومی ویمن کرکٹ ٹیم آئی سی سی ورلڈ کپ کوالیفائرز میں شرکت کے لیے افریقی ملک زمبابوے کے دارالحکومت ہرارے میں موجود ہے، پی سی بی نے افریقی ممالک میں کورونا وائرس کے نئے ویری اینٹ کے پیش نظر ہرارے میں موجود پاکستان ویمن ٹیم کو محتاط رہنے کی خصوصی ہدایات جاری کی ہیں۔ اس حوالے سے پی سی پی میزبان ملک اور اپنی مینجمنٹ کے ساتھ مکمل رابطے میں ہے۔

دوسری جانب جنوبی افریقا میں کورونا وائرس کی نئی قسم سامنے آنے کے بعد آئی سی سی کوالیفائرز کی یو اے ای میں منتقلی اور کھلاڑیوں کی ہرارے سے روانگی کے پلان پر غور کر رہا ہے۔

واضح رہے کہ متحدہ عرب امارات ، سعودی عرب اور امریکا سمیت دنیا کے کئی ممالک نے کورونا کی نئی قسم سامنے آنے کے بعد جنوبی افریقا اور زماباوے سمیت افریقا کے مختلف ممالک پر سفری پابندیاں عائد کردی ہیں۔