لاہور: سابق ٹیسٹ کرکٹر عاقب جاوید نے دو ٹوک اعلان کردیا ہے کہ وہ بورڈ میں کوئی عہدہ نہیں لینا چاہتے۔

سابق ٹیسٹ کرکٹر عاقب جاوید نے قومی ٹیم کی کوچنگ میں دل چسپی اور پاکستان کرکٹ بورڈ میں جاب کرنے کی اطلاعات کو من گھڑت قرار دے دیا ہے۔

عاقب جاوید کا کہنا ہے کہ مصباح سے کوئی ذاتی اختلاف نہیں۔ کوالیفاٰئیڈ لوگوں کو ہی میرٹ پر موقع ملنا چاہیے، زندگی میں کسی سے نوکری نہیں مانگی۔ اپنی مرضی اور پلاننگ کے مطابق کام کرنے کا عادی ہوں۔

سابق ٹیسٹ کرکٹر کا کہنا تھا کہ ایسی جگہ کام نہیں کرسکتا جہاں کسی اور کے تابع ہوں۔ لاہور قلندرز کے ساتھ جس طرح کھلے ذہن اور اپنے آئیڈیاز کے ساتھ کام کررہا ہوں تو اس میں ہی خوش یوں۔

عاقب جاوید کا کہنا تھا کہ لاہور قلندرز کی طرف سے پاکستان کرکٹ کو نئے کھلاڑی دینے کے لیے ڈویلپمنٹ کا کام زبردست طریقہ سے جاری ہے اور شاہین شاہ آفریدی، حارث روف، دلبر حسین کی شکل میں کھلاڑیوں کی پرفارمنس پوری دنیا دیکھ رہی ہے۔

عاقب جاوید کا مزید کہنا تھا کہ اب ایک اور لڑکا لاہور قلندرز کے پلیٹ فارم سے بگ بیش میں کھیلے گا تو یقین ہے کہ لوگ ایک بار پھر ہمارے اس پلئئرز ڈویلپمنٹ پروگرام کو سراہیں گے۔

واضح رہے کہ سابق ٹیسٹ کرکٹر عاقب جاوید لاہور قلندرز کے ڈائریکٹر آپریشنز ہیں جبکہ لاہور قلندرز کے کپتان سے متعلق تبدیلی کو قبل از وقت قرار دیتے ہوئے کہنا تھا کہ لاہور قلندرز کا کپتان کون ہوگا، اس کے لیے ابھی انتظار کرنا ہوگا۔