انگلینڈ کے ٹیسٹ کرکٹر ڈیوڈ ملان نے انکشاف کیا  ہے کہ رواں برس کے آغاز میں ٹیم میں واپسی سے قبل انہیں خدشہ تھا کہ ان کا ٹیسٹ کیریئر ختم ہو گیا ہے۔

34 سالہ جنوبی افریقی نژاد انگلش کرکٹر ڈیوڈ ملان گابا میں ایشز سیریز کے پہلے ٹیسٹ کی دوسری اننگز میں 80 رنز بناکر ناٹ آؤٹ ہیں۔

برسبین کے گرم موسم میں تقریباً دو سیشنز تک بیٹنگ کرنے کے بعد  ملان کا کہنا تھا کہ وہ اپنی اننگز کے ہر منٹ سے لطف اندوز ہوئے ہیں۔

ان کا کہنا تھا کہ کرکٹ کے تمام فارمیٹس میں ٹیسٹ کرکٹ ایک اونچے پہاڑ کی چوٹی کی مانند ہے۔ آپ ٹی ٹوئنٹی  یا ون ڈے کرکٹ میں جیسا چاہیں کر سکتے ہیں، لیکن آپ  کے کرکٹ کیریئر کا فیصلہ ٹیسٹ کیریئر کی بنیاد پر ہوتا ہے۔

ملان اور انگلینڈ کے کپتان جو روٹ (86) نے 159 رنز کی ناقابل شکست شراکت میں تیسرے دن کے اختتام پر اپنی ٹیم کا اسکور 2 وکٹ کے نقصان پر 220 رنز تک پہنچادیا  ہے جس کے بعد یقینی شکست کے بادل کچھ چھٹ گئے ہیں۔

پہلی اننگز میں 147 رنز پر ڈھیر ہونے اور 278 رنز کی سبقت  کے پہاڑ تلے دبنے کے بعد اگر انگلینڈ اس میچ کو ڈرا کرنے میں بھی کامیاب رہتا ہے تو  یہ ایک قابل ذکر کارنامہ ہو گا ۔