لاہور: فاسٹ بولر محمد حسنین آسٹریلیا کی بگ بیش لیگ میں شامل ہوگئے ہیں جس کے لیے انہوں نے معاہدہ بھی کرلیا ہے۔

تفصیلات کے مطابق قومی کرکٹ ٹیم کے کم عمر فاسٹ بولر محمد حسنین آسٹریلیا کی بگ بیش لیگ میں کھیلیں گے جس کے لیے انہوں نے سڈنی تھنڈر کے ساتھ معاہدہ کرلیا ہے۔

اس حوالے سے سڈنی تھنڈر کے فاسٹ بولر بین کٹنگ کا کہنا ہے کہ محمد حسنین کے آنے سے فاسٹ بولنگ کا شعبہ مضبوط ہو گا، انہوں نے اپنی رفتار سے صلاحیتیوں کو منوایا ہے۔

بین کٹنگ کا مزید کہنا تھا کہ محمد حسنین بہت تیز بولنگ کرتے ہیں کوئٹہ گلیڈی ایٹرز میں ان کے ساتھ کھیلا ہوں، انہیں آسٹریلیا میں بولنگ کر کے اچھا لگے گا۔

واضح رہے کہ اس سے قبل قومی ٹیم کے فاسٹ بولر حارث رؤف نے بھی بگ بیش لیگ کی فرنچائز ملیبرن اسٹار سے معاہدہ کیا ہے اور وہ بھی بگ بیش لیگ میں نظر آئیں گے۔

اس حوالے سے میلبرن اسٹارز کے کوچ ڈیوڈ بسی کا کہنا تھا کہ اس سیزن میں اب حارث رؤف بھی ٹیم کا حصہ ہوں گے، ان کی وجہ سے بولنگ کی کوالٹی اور انرجی بڑھے گی۔