سابق آسٹریلوی کرکٹر مائیکل سلیٹر کو گھریلو تشدد کیس میں ایک مرتبہ پھر گرفتار کرلیا گیا ہے۔

غیر ملکی میڈیا کے مطابق سابق آسٹریلوی کرکٹر مائیکل سلیٹر کو مبینہ طور پر گرفتاری کے احکامات کی خلاف ورزی کرنے کی بنا پر گرفتار کیا گیا ہے جس کے بعد آج انہیں عدالت میں پیش کیا جائے گا۔

رپورٹس کے مطابق مائیکل سلیٹر کو سڈنی کے علاقے سے گرفتار کیا گیا ہے جبکہ اس سے قبل مائیکل سلیٹر کو رواں برس اکتوبر کے مہینے میں گھریلو تشدد کے واقعے میں گرفتار کیا گیا تھا۔

واضح رہے کہ مائیکل سلیٹر آسٹریلین ٹیم کے سابق بیٹسمین ہیں جو 1993 سے 2001 تک اپنے ملک کے لیے 74 ٹیسٹ میچز کھیل چکے ہیں اور ریٹائرمنٹ کے بعد وہ کمنٹری بھی کرتے رہے ہیں۔

میڈیا رپورٹس کے مطابق مائیکل سلیٹر کو گزشتہ ہفتے آسٹریلین ٹی وی نے کام سے فارغ کردیا تھا جبکہ رواں ماہ کے اوائل میں ہی انہیں ٹی وی کمنٹری ٹیم سے بھی اپنے ملک کے وزیر اعظم پر تنقید کی بنا پر چھٹی دے دی گئی تھی۔

یاد رہے کہ مائیکل سلیٹر اس سے قبل بھی خواتین کے ساتھ نازیبا رویہ رکھنے کی وجہ سے خبروں کی زینت بنے رہے ہیں۔