سابق بھارتی کرکٹر سنیل گواسکر نے ویرات کوہلی کو ون ڈے کی کپتانی سے ہٹانے کی وجہ بتادی ہے۔

سابق بھارتی کرکٹر سنیل گواسکر کا بھارتی میڈٰیا سے گفتگو کرتے ہوئے کہنا تھا کہ ویرات کوہلی کے پاس ہر جگہ جیتنے کا ریکارڈ ہے البتہ انہوں نے آئی سی سی ایونٹ نہیں جیتے لیکن دو طرفہ ایونٹس ضرور جیتے ہیں۔

سنیل گواسکر کا کہنا تھا کہ کوہلی کی قیادت میں ہمیشہ بھارتی ٹیم کو فتح ملی ہے، اس لیے لوگوں کے پاس کوہلی کی قائدانہ صلاحیتوں سے ناخوش ہونے کی کوئی وجہ نہیں تھی۔

گواسکر کا کہنا تھا کہ میرے خیال میں کوہلی کو ہٹانے کی اصل وجہ ایک لائن ہی ہوسکتی ہے جہاں سے یہ معاملہ شروع ہوا تھا، مجھے یہی لگتا ہے کہ ستمبر میں جو ویرات کوہلی نے ٹی ٹوئنٹی کی کپتانی چھوڑتے وقت بیان دیا تھا اور اسی وجہ سے انہیں ون ڈے کی کپتانی سے بھی ہٹایا گیا ہے۔

انہوں نے مزید کہا کہ میں نے کوہلی کی پریس کانفرنس سنی ہے اور مجھے لگتا ہے کہ اس کی ایک لائن کو تبدیل کیا جاسکتا تھا کہ میں ون ڈے اور ٹیسٹ میں بھارت کی قیادت کرنے کے لیے دستیاب ہوں۔

واضح رہے کہ بھارت میں روہت شرما کو ون ڈے ٹیم کا کپتان بنائے جانے کے بعد ایک نیا تنازع کھڑا ہوگیا ہے۔