لندن: انگلینڈ کے خلاف دوسرے ٹیسٹ میچ کے لئے آسٹریلیا نے پلیئنگ الیون کا اعلان کردیا ہے۔

آسٹریلیا نے انگلینڈ کے خلاف دوسرے ٹیسٹ میچ کے لیے پلیئنگ الیون کا اعلان کیا ہے جبکہ اوپنر ڈیوڈ وارنر نے فٹنس ٹیسٹ پاس کر لیا ہے جس کے بعد انہیں بھی پلیئنگ الیون میں شامل کیا گیا ہے۔

آسٹریلیا نے ٹیم میں ایک تبدیلی کی ہے اور ان فٹ ہونے والے فاسٹ بولر جوش ہیزل ووڈ کی جگہ جھے رچرڈسن کو شامل کیا گیا ہے جبکہ ایڈیلیڈ میں ڈے نائٹ ٹیسٹ میچ کل سے شروع ہو گا۔

واضح رہے کہ اس سے قبل کرکٹ آسٹریلیا نے فاسٹ بولر جوش ہیزل ووڈ کے سائیڈ اسٹرین انجری کی تصدیق کی تھی اور ساتھ میں ان کی ایڈیلیڈ ٹیسٹ میں شرکت کے حوالے سے کہا تھا کہ وہ اس ٹیسٹ میں دستیاب نہیں ہوگی۔

یاد رہے کہ آسٹریلیا اور انگلینڈ کے درمیان 5 ٹیسٹ میچز پر مشتمل ایشز سیریز جاری ہے جس میں آسٹریلیا کو 1 صفر کی برتری حاصل ہے جبکہ یہ تمام میچز آئی سی سی ٹیسٹ چیمپئن شپ کا حصہ ہیں۔