پاکستان کرکٹ بورڈ(پی سی بی) کو قومی ٹیم  کے لیے پاور ہٹنگ کوچ کی تلاش ہے۔

پی سی بی کی جانب سے جاری کردہ پریز ریلیز  کے مطابق  پاکستان کرکٹ ٹیم  کے لیے پہلی بار الگ سے پاور ہٹنگ کوچ  بھی مقرر کرنے کا فیصلہ کیا گیا ہے۔

پاکستان کرکٹ بورڈ  نے کوچز کی تلاش شروع کر دی ہے  جبکہ نیشنل ہائی پرفارمنس سینٹر میں کوچز کی تقرری کے لیے اشتہار  بھی دے دیا گیا ہے۔

پی سی بی نے ہائی پرفارمنس کوچ ، بیٹنگ کوچ، بالنگ کوچ ،فیلڈنگ کوچ اور پاور ہٹنگ کوچ کے لیے درخواستیں طلب کی ہیں۔

واضح رہے کہ پاکستان ٹیم کیلئے پہلی بار پاور ہٹنگ کوچ کی خدمات حاصل کی جائیں گی جبکہ کوچز نیشنل ہائی پرفارمنس سینٹر میں تعینات ہوں گے اور کوچز کا کردار نئی نسل کے کرکٹرز پر فوکس ہو گا۔

 واضح رہے کہ نیشنل ہائی پرفارمنس سینٹر میں اس وقت ثقلین مشتاق ہیڈ انٹر نیشنل پلیئر ڈویلپمنٹ ہیں جنہوں نے مصباح الحق کے مستعفی ہونے کے بعد عبوری ہیڈ کوچ کی ذ مہ داریاں نبھائی ہیں ۔

 شاہد اسلم بھی بنیادی طور پر ہائی پرفارمنس کوچ ہیں لیکن ٹیم کیساتھ اسسٹنٹ  ہیڈ کوچ تعینات رہے ہیں۔ اس کے علاوہ بیٹنگ کوچ کے عہدے پر محمد یوسف ذمہ داریاں سنبھالے ہو ئے ہیں۔

یاد رہے کہ نیشنل ہائی پرفارمنس سینٹر میں وکٹ کیپر، فیلڈنگ کوچ عتیق الزمان اور بالنگ کوچ محمد زاہد مستعفی ہو چکے ہیں۔

پاکستان ٹیم کے ساتھ فیلڈنگ کوچ کی ذمہ داریاں نبھانے والے عبدالمجید بھی نیشنل ہائی پرفارمنس کے کوچز میں شامل  تھے۔

چیئرمین رمیز راجہ نے چند روز قبل میڈیا سے گفتگو کے دوران بتایا تھا کہ ہائی پروفائل کوچز کی تقرری نیشنل ہائی پرفارمنس سینٹر میں ہو گی ، وہاں سے وہ قومی ٹیموں کے ساتھ کام کریں گے۔