پاکستان سپر لیگ سیزن 7 کے لیے پشاور زلمی نے اپنا آفیشل اینتھم ’آیا زلمی‘ ریلیز کردیا ہے۔

پاکستان سپر لیگ (پی ایس ایل) سیزن 7 کے لیے پشاور زلمی نے اپنا آفیشل اینتھم ریلیز کیا ہے جس کا نام ’آیا زلمی‘ رکھا گیا ہے جبکہ اس اینتھم میں پاکستانی اداکار ماہرہ خان نے شاندار پرفارمنس کا مظاہرہ کیا ہے۔

پشاور زلمی کے ’آیا زلمی‘ اینتھم کو معروف پشتو گلوکار زرسنگا، درانی، سنی خان، طیب رحمان، زوہا زبیری اور زارا مدنی نے گایا ہے جبکہ اس اینتھم میں ٹیم کے کپتان وہاب ریاض، کامران اکمل، شعیب ملک، عثمان قادر اور حسین طلعت کو بھی دکھایا گیا ہے۔

آیا زلمی اینتھم کی ویڈیو حسن داوڑ نے ڈائریکٹ کی ہے جبکہ اس کو پروڈیوس روحیل حیات نے کیا ہے۔

واضح رہے کہ پی ایس ایل 7 میں پشاور زلمی اپنا پہلا میچ آج کوئٹہ گلیڈی ایٹرز کے خلاف کھیلے گی جو پاکستانی وقت کے مطابق شام 7:30 بجے شروع کیا جائے گا۔

یاد رہے کہ آج کے میچ میں پشاور زلمی اپنے کپتان وہاب ریاض کے بغیر اترے گی جو کہ کورونا وائرس میں مبتلا ہونے کے باعث قرنطینہ میں موجود ہیں جبکہ ان کی جگہ کپتانی کے فرائض شعیب ملک انجام دیں گے۔